სკანდალი არგენტინულ რაგბიში - კაპიტანი ნაკრებიდან ქსენოფობიური და რასისტული პოსტების გამო მოკვეთეს

ახალი ზელანდიის ნაკრებთან მოპოვებული ისტორიული გამარჯვებიდან 3 კვირის შემდეგ, არგენტინის რაგბის კავშირის გადაწყვეტილებით ნაკრების კაპიტანი პაბლო მატერა შაბათს 3 ერის გათამაშების დასკვნითი მატჩშისთვის გუნდიდან მოკვეთეს და კაპიტნობაც ჩამოართვეს.

მიზეზი მატერას მიერ 9 წლის წინ საკუთარ "თვითერის" გვერდზე დაწერილი რასისტული და ქსენოფობიური პოსტებია, რომელიც არგენტინულ მედიაში ახლახანს გახმაურდა. როგორც იცით, მატერა არგენტინა XV-თან ერთად მონაწილეობას იღებდა სამხრეთაფრიკულ ვოდაკომის თასზე 2010-2013 წლებში, გარდა ამისა, მონაწილეობა მიიღო 2012 წელს ამავე ქვეყანაში გამართულ 20 წლამდელთა მსოფლიო თასზე. 

მისი იმდროინდელი ერთ-ერთი პოსტი ასე ითარგმნება: "სამხრეთ აფრიკა! ვტოვებ ამ შავებით სავსე ქვეყანას!"

2012 წელს დაწერილ პოსტში კი ვკითხულობთ: "კარგი დილაა, რომ გავიდეთ მანქანით და შავკანიანებს გადავუაროთ." 

მატერას აგრეთვე ქსენოფობიური კომენტარები ჰქონდა გაკეთებული ბოლივიელებსა და პარაგვაელებზე. არგენტინელი მესამეხაზელის პოსტები ახლა წაშლილია და თავად მორაგბემ განაცხადა, რომ ძალიან რცხვენია და ბოდიშს უხდის ყველას, ვინც შეურაცხყოფილად იგრძნო თავი მისი პოსტების გამო. 

მატერას გარდა, იმავე მიზეზით ავსტრალიასთან შეხვედრაში მონაწილეობას არ მიიღებენ გიდო პეტი და სანტიაგო სოსინო.