მერაბ შარიქაძე: "თავში დარტყმა მივიღე და ვფიქრობ, მეტოქე ყვითელ ბარათს იმსახურებდა"

შემოდგომის ერთა თასის მესამე ტურში ირლანდიის ნაკრები "ავივა სთედიუმზე" საქართველოს ნაკრებს დაუხვდა და ბრძოლაში 23:10 იმარჯვა.

შეხვედრის მიწურულს ტრავმა მიიღო "ბორჯღალოსნების" კაპიტანმა მერაბ შარიქაძემ, რომელსაც მოედნის დატოვება მოუწია. საბედნიეროდ, მისი დაზიანება სერიოზული არ გამოდგა.

"კარგად ვარ და მოედნის დატოვება არ მინდოდა, მაგრამ პროტოკოლის თანახმად, შეცვლა აუცილებელი იყო. მიმაჩნია, რომ ეს ეპიზოდი მსაჯებმა გაატარეს. თავში დარტყმა მივიღე და ვფიქრობ, მეტოქე ყვითელ ბარათს იმსახურებდა.

რაც შეეხება თამაშს, უკეთ გავისარჯეთ ვიდრე უელსთან, თუმცა უკეთაც შეიძლებოდა. დღესდღეისობით ირლანდია უკეთესი გუნდია, ვიდრე უელსი. ფაქტი ისაა, რომ ვვითარდებით, ბევრს ვსწავლობთ და იმედია და ჩვენი განვითარება გაგრძელდება", - განაცხადა მერაბმა.