გიორგი კვესელაძე მესამე ტურის საუკეთესო მორაგბეთა გამოკითხვაში მონაწილეობს

დასრულდა შემოდგომის ერთა თასის ჯგუფური ეტაპი და ტურნირის ოფიციალური საიტი მესამე ტურის საუკეთესო მორაგბის გამოსავლენად გამოკითხვას ატარებს. ჩვენთვის სასიხარულოა, რომ მასში მონაწილეობას იღებს საქართველოს ნაკრების ცენტრი გიორგი კვესელაძე, რომელმაც ირლანდიასთან მატჩის პირველ ტაიმში ბრწყინვალე ლელოს დადება მოახერხა. 

ქართველი მორაგბე გამოკითხვაში ასე არის დახასიათებული: 

"საქართველომ მართალია სენსაცია ვერ შემოგვთავაზა ირლანდიასთან მატჩში, თუმცა გიორგი კვესელაძემ შემოდგომის ერთა თასზე მათ პირველი ქულები ბრწყინვალე ინდივიდუალური ლელოთი მოუპოვა. 

ქართველმა ცენტრმა ბურთი მოედნის ცენტრში მიიღო, რამდენიმე "დამი" შეასრულა და მეტოქეები ჩამოიცილა, რითიც ირლანდიის ნაკრების ლელოსკენ გაიკვალა გზა და ბოლომდე ირბინა. კვესელაძემ ქართველთაგან ყველაზე მეტი 59 მეტრი ირბინა ბურთით და აგრეთვე შეასრულა 17 დიდებული ბოჭვა, მათ შორის სიჯეი სტანდერის წინააღმდეგ, რომელმაც ირლანდიის ნაკრების 8 ნომერს უკან დაახევინა, ეს კარგად აღწერს მის დაცვით უნარებს", - ნათქვამია აღწერაში. 

გამოკითხვაში კვესელაძის გარდა აგრეთვე მონაწილეობენ ინგლისის ნაკრების მესამეხაზელი სემ ანდერჰილი, უელსელი ცენტრი ჯონი უილიამსი და ფრანგი ფულბეკი ბრის დულანი. გამოკითხვა ორშაბათს 19:00 საათზე შეწყდება და ხმის მიცემა ნებისმიერ გულშემატკივარს აღნიშნულ ბმულზე შეუძლია.