დავით ნინიაშვილი: "ვეცდები ეს შანსი მაქსიმალურად გამოვიყენო"

კვირას საქართველოს ნაკრების შემადგენლობაში დებიუტი ექნება 18 წლის ფულბეკ დავით ნინიაშვილს, რომელიც მარქაფაში იქნება და ბორჯღალოსნებს სავარაუდოდ მეორე ტაიმში გააძლიერებს.

ამასთან დაკავშირებით საქართველოს რაგბის კავშირის ოფიციალური საიტი სტატიას აქვეყნებს, რომელსაც უცვლელად გთავაზობთ. 

დავით ნინიაშვილმა რაგბის თამაში 8 წლის ასაკში, სკოლაში დაიწყო, გარკვეული პერიოდი ჭიდაობით დაკავდა, თუმცა საბოლოოდ ოვალით თამაშმა უფრო მოხიბლა და რაგბს დაუბრუნდა.

მან ‘ხვამლთან’ ერთად საქართველოს რეგიონალური და პირველი ლიგა ითამაშა, 18-წლამდე ბორჯღალოსნებთან ერთად მოიგო ევროპის ჩემპიონატი და 19-წლამდე ნაკრებთან ერთად ფრანგულ ტურნეზე იმყოფებოდა, თუმცა კოვიდ-პანდემიის გამო ახალგაზრდული მსოფლიო ჩემპიონატი გაუქმდა და ახლა დებიუტი ეროვნულ გუნდში, ‘ავივაზე’ ექნება:

„ძალიან ბედნიერი და გახარებული ვარ. ეროვნული ნაკრების გაფართოებულ შემადგენლობაში მაისიდან ვარჯიშობ. გავიცანი ნაკრების წევრები, რომლებიც მხარში მიდგანან და მეხმარებიან განვითარებაში, მისწორებენ ვარჯიშებზე დაშვებულ შეცდომებს. ასევე მნიშვნელოვნად მოვუმატე ფიზიკურად და თამაშის ცოდნის კუთხით. ინგლისში ყველა ვარჯიში სრულყოფილად ჩავატარე, ახლა მივიღე შანსი, რომელსაც მოუთმენლად ველოდი და ვეცდები ეს შანსი მაქსიმალურად გამოვიყენო“.

გუნდის მთავარი მწვრთნელი ლევან მაისაშვილი დარწმუნებულია, რომ 18 წლის დებიუტანტს ბევრის მიღწევა შეუძლია:

„დავით ნინიაშვილს მწირი გამოცდილება აქვს, დიდ 10-შიც კი არ უთამაშია და მასთან მიმართებაში ცოტას ვფრთხილობდით. გვსურდა გუნდთან ერთად ყოფნით თავდაჯერებულობა მოეპოვებინა და ახლა თამაშის შანსს მიიღებს. ის შრომისმოყვარე ახალგაზდაა და მონდომებით ბევრის მიღწევა შეუძლია“.
„შემოდგომის ერთა თასის“ მესამე რაუნდში ბორჯღალოსნები ირლანდიას 29 ნოემბერს, საქართველოს დროით 18 საათზე ეთამაშებიან.

rugby.ge