ირლანდიური გამოცემა: "ნიკა ამაშუკელი არის მსაჯი, რომელსაც უმაღლეს დონეზე უფრო მეტად ვნახავთ"

© Icon Sport

გასულ შაბათ-კვირას შემოდგომის ერთა თასის და 3 ერის მატჩები გაიმართა. შოტლანდიის ნაკრები "მარიფილდზე" საფრანგეთს დაუხვდა და 15:22 დამარცხდა. 

ეს იყო პირველი მატჩი ტიერ 1-ის ქვეყნებს შორის, რომელსაც ქართველი მსაჯი მოემსახურა. ნიკა ამაშუკელი გვერდითი მსაჯი და შესაბამისად, მსოფლიოში ერთ-ერთი გამორჩეული მსაჯის უეინ ბარნსის ასისტენტი გახლდათ. 26 წლის ამაშუკელმა დაკისრებულ მოვალეობას თავი მშვენივრად გაართვა, აქტიურად იყო თამაშში ჩართული და შეხვედრის ბოლოს ბარნსს ერთ-ერთი მნიშვნელოვანი გადაწყვეტილების მიღებაში დაეხმარა, როდესაც ნიკამ სწორად შენიშნა, რომ ფრანგების 5-მეტრიანში უკანასკნელად ბურთს გაელ ფიკუ შეეხო და ისე გადავიდა აუტში.

ცნობილმა გამოცემამ irishtimes.com-მა გასული მატჩების მსაჯობას სპეციალური სტატია მიუძღვნა. სტატიის ავტორი ვეტერანი მსაჯი და ირლანდიის რაგბის კავშირის მსაჯების ყოფილი დირექტორი ოუენ დოილია. ირლანდიელმა ვეტერანმა მსაჯმა აღნიშნულ სტატიაში ნიკა ამაშუკელიც მოიხსენია. მან ქართველ მსაჯს მოკლე, მაგრამ ძალზე სასიამოვნო დახასიათება მიუძღვნა: "ქართველი მსაჯი ნიკა ამაშუკელი გახლდათ გვერდითი მსაჯი, უეინ ბარნსის ასისტენტი და დაკისრებულ მოვალეობას თავი კარგად გაართვა. ის არის მსაჯი, რომელსაც ჩვენ უეჭველად ვიხილავთ ამ დონეზე უფრო მეტად."

შეგახსენებთ, რომ ნიკა ამაშუკელს აქამდე ისეთ ტურნირებზე უმსაჯია, როგორებიცაა: 20-წლამდელთა 6 ერი, რაგბი ევროპის ჩემპიონატი, მსოფლიოს 20-წლამდელთა ჩემპიონატი, მსოფლიოს 20-წლამდელთა ალაფა, პრო 14 და ჩელენჯ თასი.