ირლანდიის ნაკრებმა საქართველოსთან მატჩისთვის ახალი ბურჯი დაიმატა

ირლანდიის ნაკრების სამწვრთნელო შტაბმა საქართველოსთან მატჩისთვის ახალი მარცხენა ბურჯი დაიმატა.

ტრავმირებული ედ ბირნის ნაცვლად, ნაკრებში "ალსტერის" ბურჯს 24 წლის ერიკ ო'სალივანს უხმეს, რომელსაც აქამდე ირლანდიის ნაკრების კვართით არ უთამაშია და შესაძლოა, საქართველოს წინააღმდეგ დებიუტი ჰქონდეს. "სამყურებს" ო'სალივანის გარდა, კიდევ ორი ჯანმრთელი მარცხენა ბურჯი ჰყავთ გაფართოებულ გუნდში: კიან ჰილი (102 კეპი) და ფინლი ბელჰემი (13 კეპი).

დაზიანება აწუხებდა მარჯვენა ბურჯ ჯონ რაიანს (21 კეპი), რომელიც სავარაუდოდ მიმდინარე კვირაში სრულფასოვნად განაახლებს ვარჯიშს და კვირას გასამართი მატჩისთვის მზად იქნება. 

ირლანდიის რაგბის კავშირის მაღალი შესრულების ცენტრში განაგრძობენ რეაბილიტაციას მგეზავი ჯონათან სექსტონი (94 კეპი) და რობი ჰენშოუ (46 კეპი), რომელთა გამოჩენასაც "ბორჯღალოსნებთან" მატჩისთვის არ უნდა ველოდოთ. 

შეგახსენებთ, რომ შემოდგომის ერთა თასის მესამე ტურში ირლანდია "ავივა სთედიუმზე" საქართველოს უმასპინძლებს. მატჩი კვირას თბილისის დროით 18 საათზე დაიწყება.