არგენტინას ხუან იმოფი გამოაკლდა

3 ერის გათამაშების მეოთხე ტურის შეხვედრაში ავსტრალიის წინააღმდეგ ტრავმა მიიღო და ტურნირის დარჩენილ ნაწილში მონაწილეობას ვეღარ მიიღებს არგენტინის ნაკრების გარემარბი ხუან იმოფი. 

ინციდენტი მატჩის პირველ ტაიმში მოხდა და ბარძაყის ტრავმის მიღების შემდეგ იმოფი მოედანზე აღარ დაბრუნებულა. 32 წლის მორაგბემ არგენტინის ნაკრების შემადგენლობაში 2015 წლის შემდეგ პირველად იასპარეზა და ახალ ზელანდიასთან მოგებულ ისტორიულ მატჩში ძირითად შემადგენლობაში გახლდათ. 

"პუმებს" 3 ერზე ორი თამაში აქვთ დარჩენილი, შაბათს ისინი ახალი ზელანდიის ნაკრების წინააღმდეგ მეორე შეხვედრას გამართავენ და მოსალოდნელია, რომ მარიო ლედესმა შემადგენლობაში ცვლილებებს მიმართავს. იმოფის ნაცვლად სავარაუდოდ რამირო მოჟანო იასპარეზებს.