საქართველოს ნაკრებმა 8 ერის ორი ტურის შემდეგ, საკუთარი ანტირეკორდი დაამყარა

© Rebecca Naden/Reuters

შემოდგომის ერთა თასის მეორე ტურში საქართველოს ნაკრები "პარკ სკარლეტსზე" უელსთან 0:18 დამარცხდა.

"ბორჯღალოსნები" 8 ერის ტურნირზე ზედიზედ მეორედ დამარცხდნენ მშრალი ანგარიშით, წინა ტურში ინგლისის ნაკრებმა "თვიქნემზე" 40:0 იმარჯვა.

საქართველოს ნაკრების 31-წლიანი არსებობის განმავლობაში ეს იყო მეოთხე შემთხვევა, როდესაც გუნდმა ქულების მოპოვება ვერ მოახერხა. პირველად ეს 1999 წლის მსოფლიო თასის შესარჩევ ეტაპზე მოხდა - 1998 წლის 14 ნოემბერს საქართველოს ნაკრები ირლანდიასთან დუბლინში 0:70 დამარცხდა, მეორედ  ასეთი შემთხვევა 2018 წლის 25 ივნისს დაფიქსირდა - მილტონ ჰეიგის მიერ მომზადებულმა გუნდმა იაპონიაში 0:28 წააგო. დანარჩენი ორი შემთხვევა კი მიმდინარე ტურნირზე ვიხილეთ.

რაც შეეხება ანტირეკორდს, "ბორჯღალოსნებმა" არსებობის განმავლობაში გუშინ 239-ე შეხვედრა ჩაატარეს და პირველად მოხდა, რომ ქართველმა მორაგბეებმა ზედიზედ ორ მატჩში ქულების მოპოვება ვერ შეძლეს და მშრალი ანგარიშით დამარცხდნენ.