უელსის ნაკრები საქართველოსთან მატჩს საშინელი სერიით ხვდება

შაბათ-კვირას შემოდგომის ერთა თასის სამი შეხვედრა გაიმართება, ხოლო იტალია - ფიჯის მატჩი, რომელიც ასევე შაბათს უნდა ჩატარებულიყო, ფიჯელთა ბანაკში კორონავირუსის გავრცელების გამო, გაუქმდა.

უელსის ნაკრები ხვალ "პარკ სკარლეტსზე" საქართველოს უმასპინძლებს. "დრაკონები" ხვალინდელ მატჩში უპირობო ფავორიტები არიან, თუმცა აღსანიშნავია, რომ უეინ პივაკის გუნდი ძალიან ცუდ ფორმაში იმყოფება და საშინელი სერია აქვთ. 

"დრაკონებს" ზედიზედ ექვსი მატჩი აქვთ წაგებული. მათ უკანასკნელად 1 თებერვალს 6 ერის მატჩში "ფრინსიფალითი სთედიუმზე" იტალია 42:0 გაანადგურეს, მას შემდგომ შინ შოტლანდიასთან (10:14) და საფრანგეთთან (23:27), გასვლაზე კი ირლანდიასთან (14:24), ინგლისთან (30:33), საფრანგეთთან (21:38) და ირლანდიასთან (9:32) დამარცხდა.      

შეგახსენებთ, რომ უელსი - საქართველოს მატჩი 21 ნოემბერს თბილისის დროით 21:15 საათზე დაიწყება.