საქართველოსთან მატჩში, უელსის ნაკრების ძირითადი შემადგენლობის 3 მორაგბის თამაში საეჭვოა

უელსური პრესის ცნობით, საქართველოსთან მატჩში "დრაკონების" ძირითადი შემადგენლობის სამი მორაგბის თამაში საეჭვოა.

32 წლის შუამარბმა ჯონათან დევისმა (83 კეპი) ირლანდიასთან მატჩში მუხლი იტკინა. უელსელთა შერკინების მწვრთნელის ჯონათან ჰამფრისის თქმით, უახლოესი 24 საათის განმავლობაში გამოჩნდება, თუ რამდენად სერიოზულია ეს ტრავმა და შეძლებს თუ არა, საქართველოსთან მატჩში თამაშს. 

ასევე საეჭვოა მესამეხაზელების როს მორიარტის (45 კეპი) და ჯოშ ნავიდის (24 კეპი) თამაში. მათ ირლანდიასთან და საფრანგეთთან განვლილ შეხვედრებში მონაწილეობა არ მიუღიათ. ჰამფრისმა აღნიშნა, რომ სამწვრთნელო შტაბი და სამედიცინო პერსონალი ყოველდღიურად აკვირდებიან ამ მორაგბეებს, თუმცა ახლა კონკრეტული რაღაცის თქმა გაუჭირდება. ცნობისთვის, მორიარტის ტერფი აწუხებს, ხოლო ნავიდის ტვინის შერყევა ჰქონდა.

შეგახსენებთ, რომ უელსი - საქართველოს მატჩი 21 ნოემბერს "პარკ სკარლეტსზე" თბილისის დროით 21:15 საათზე დაიწყება.