ბატისტა დელგი, შესაძლოა, ქართველი მორაგბეების თანაგუნდელი გახდეს

არგენტინის ნაკრების ფრთამ ბატისტა დელგიმ, შესაძლოა, კარიერა "ბორდოში" განაგრძოს.

ჟირონდელთა 23 წლის გარემარბმა ჟოფრი კროსმა 13 ნოემბერს "კასტრთან" მოგებულ (30:29) მატჩში მუხლის მძიმე ტრავმა მიიღო და თამაშს დაახლოებით 9-დან 12 თვის განმავლობაში ვეღარ შეძლებს. 

ფრანგული პრესის ცნობით, "ბორდოს" ხელმძღვანელობას კროსის შემცვლელად "პუმების" 23 წლის ფრთის ბატისტა დელგის სამედიცინო ჯოკრის სტატუსით დამატება სურს, რომელიც ამჟამად "ხაგუარესის" საკუთრებაში იმყოფება, თუმცა პანდემიის დაწყების შემდეგ, არგენტინულ ფრენჩაიზს აღარ უთამაშია და 2021 წელსაც მისი რომელიმე ტურნირზე თამაში დიდი კითხვის ნიშნის ქვეშაა. დელგი კი არგენტინის ნაკრების ძირითადი მოთამაშეა და მას რეგულარული სათამაშო პრაქტიკა სჭირდება, ამიტომაც ტრანსფერის ალბათობა მაღალია. 

დელგის არგენტინის ნაკრების კვართით 15-ჯერ უთამაშია და 5 ლელოს გატანა მოახერხა. "ხაგუარესის" რიგებში კი სუპერ რაგბიში 22 მატჩი ჩაატარა და 12 ლელო დადო.

შეგახსენებთ, რომ "ბორდოს" რიგებში სამი ქართველი მორაგბე ასპარეზობს: ლექსო ყაულაშვილი, ლაშა ტაბიძე და ბექა გორგაძე.