როდის დამარცხდა უკანასკნელად ახალი ზელანდია ზედიზედ ორჯერ?

ახალი ზელანდიის ნაკრებისთვის 2020 წელი კარგად ვერ მიდის. შაბათს "ოლ ბლექსმა" მეხუთე კალენდარული შეხვედრა გამართა და არგენტინის ნაკრებთან ისტორიაში პირველად დამარცხდა. "პუმებმა" სიდნეიში გამართულ რაგბი ჩემპიონშიპის მატჩში 25:15 იმარჯვეს. 

აღსანიშნავია, რომ ახალი ზელანდიის ნაკრებმა ზედიზედ მეორე მატჩი წააგო, რაც უკანასკნელად 2011 წელს მოხდა. როგორც იცით, "ოლ ბლექსმა" 7 ნოემბერს ბრიზბენში ავსტრალიის ნაკრებთან 22:24 წააგო. რაც შეეხება 2011 წელს, მაშინ "შავები" 3 ერის ტურნირზე ჯერ სამხრეთ აფრიკასთან დამარცხდნენ (5:18) პორტ ელიზაბეთში, შემდეგ კი ავსტრალიასთან წააგეს (20:25) ბრიზბენში, იმავე "სანკორპ სთედიუმზე", სადაც 10 დღის წინაც დამარცხდნენ. 

2011 წელს ახალმა ზელანდიამ 3 ერი დათმო და ტურნირი ავსტრალიამ მოიგო, თუმცა შემდეგ "ოლ ბლექსმა" მსოფლიო თასი აღმართა მეორედ. 

რაც შეეხება წლევანდელ რაგბი ჩემპიონშიპს, რომელიც სამხრეთ აფრიკის უთამაშებლობის გამო, 3 ერის ფორმატით ტარდება, ჯერჯერობით "ოლ ბლექსი" ლიდერობს 6 ქულით, თუმცა მათ სამი მატჩი აქვთ ჩატარებული, ხოლო არგენტინას და ავსტრალიას, რომელთაც თითოჯერ აქვთ ნათამაშები, ოთხი ქულა აქვთ.

"ოლ ბლექსმა" წელს სულ ხუთი შეხვედრა ჩაატარა, საიდანაც ორი მოიგო, ორი წააგო და ერთი ფრედ ითამაშა. მათ ავსტრალიასთან ოთხი ტესტ-მატჩი გამართეს, საიდანაც ორი მოიგეს, ერთი წააგეს და ერთ შემთხვევაში დაზავდნენ, ხოლო არგენტინასთან გამართულ მატჩში დამარცხდნენ. იან ფოსტერის გუნდი 2020 წლის უკანასკნელ მატჩს 28 ნოემბერს, ავსტრალიის ქალაქ ნიუკასლში არგენტინის წინააღმდეგ გამართავს და რევანშის აღების შანსი ექნება.