ბრწყინვალე არგენტინამ ახალი ზელანდია დაამარცხა და ისტორია დაწერა

დღეს ავსტრალიაში მიმდინარე 3 ერის გათამაშების მესამე ტურის შეხვედრაში ერთმანეთს არგენტინა და ახალი ზელანდია დაუპირისპირდნენ, სადაც არგენტინელებმა ისტორიულ შედეგს მიაღწიეს და "ოლ ბლექსი" არსებობის ისტორიაში პირველად დაამარცხეს, ანგარიშით 25:15.

უნდა ითქვას, რომ არგენტინელები მთელი მატჩის განმავლობაში ბრწყინვალედ გამოიყურებოდნენ და გამარჯვება სრულად დაიმსახურეს. რაც შეეხება ახალ ზელანდიას, შეიძლება ითქვას, რომ "კივებმა" ამ საუკუნეში ყველაზე უსახური თამაში ჩაატარეს და დაფიქსირებული შედეგი სრულად ასახავს მატჩის სურათს.

"პუმებმა" თამაში თავიდანვე აქტიურად დაიწყეს და ჯარიმით გაიჭრნენ წინ, რასაც ნიკო სანჩესმა ლელოც მიაყოლა და მის მიერ გატანილი კიდევ ორი ჯარიმით სამხრეთამერიკელებმა ტაიმი 16:3 მოიგეს. 

მეორე ტაიმში ახალი ზელანდია თამაშში დაბრუნებას შეეცადა, 53-ე წუთზე თავი ლელოთი გამოიჩინა "ოლ ბლექსის" კაპიტანმა სემ ქეინმა,  თუმცა თავის გუნდთან ერთად ბრწყინვალე მატჩის ჩამტარებელი ნიკო სანჩესი გატანილი ჯარიმებით მეტოქეს მიახლოების საშუალებას არ აძლევდა, ამას ერთვოდა ზელანდიელთა უჩვეულო უდისციპლინობა და ხარვეზები, როგორც დერეფანში ისე რაქში. საბოლოოდ როდესაც თამაშის ბედი უკვე გადაწყვეტილი იყო პრესტიჟის ლელო ქეილებ კლარკმა გაიტანა და საბოლოო ანგარიში არგენტინის სასარგებლოდ 25:15 დაფიქსირდა.

როგორც უკვე ვახსენეთ, ეს გახლდათ არგენტინის პირველი გამარჯვება ახალ ზელანდიასთან, ნიკო სანჩესმა კი თამაში ბრწყინვალე მონაგარით დაასრულა, არგენტინის მიერ გატანილი 25-ვე ქულა მის ანგარიშზეა და ცოტა დააკლდა სამხრეთაფრიკელი მგეზავის მიღწევის გამეორებამდე, მოგეხსენებათ 2009 წელს "ოლ ბლექსთან" მოგებულ შეხვედრაში გუნდის ყველა 31-ვე ქულა მორნე სტეინმა გაიტანა, რაც დღემდე რეკორდია.