თედო აბჟანდაძის 11 ქულა და ოთარ გიორგაძის ლელო ტულონის წინააღმდეგ (+VIDEO)

დღეს ფრანგული ტოპ 14-ის მერვე ტურის გახსნით შეხვედრაში "ტულონმა" საკუთარ მოედანზე "ბრივს" უმასპინძლა და 35:19 დაამარცხა.

როგორც აქამდე ვწერდით ტრავმა ბოლომდე არ მოურჩენია საქართველოს ნაკრების ბურჯ ბექა გიგაშვილს და შესაბამისად ის ტულონელთა განაცხადში არ იყო, სამაგიეროდ სტუმართაგან შეხვედრაში ხუთმა ქართველმა ლეგიონერმა მიიღო მონაწილეობა. 

ძირითად შემადგენლობაში იყვნენ ბურჯი სოსო ბეკოშვილი, მესამეხაზელი ოთარ გიორგაძე და მგეზავი თედო აბჟანდაძე. მარქაფადან კი მეორე ტაიმში მოედანზე ბადრი ალხაზაშვილი და ვასილ ლობჟანიძე გამოჩნდნენ. 

ქართველთა სასიხარულოდ მატჩის 53-ე წუთზე ლელოთი გამოიჩინა თავი ოთარ გიორგაძემ, რომელმაც მეტოქის 22-თან გაარღვია დაცვის ხაზი და ლელოს დასადებად ბოლომდე ირბინა. გარდა ამისა, ნაყოფიერი შეხვედრა ჩაატარა თედო აბჟანდაძემ, რომელმაც 62 წუთი ითამაშა და ამ დროის განმავლობაში 11 ქულის გატანა მოახერხა. თედომ სამიდან სამი ჯარიმა და გარდასახვა შეასრულა ზუსტად. შესაბამისად, ბრიველთა 19 ქულიდან 16 ქართველთა ანგარიშზეა.