მიქაუტაძე ახალი გუნდის სასტარტოში პირველად ითამაშებს, ტოპ 14-ში ოდიშვილის დებიუტი შედგება

შაბათს ტოპ 14-ის მერვე ტურის სამი შეხვედრა გაიმართება, ხოლო "მონპელიე" - "სტად ფრანსეს" დაპირისპირება ეპიდემიოლოგიური ვითარების გამო გადაიდო. 

"ბორდო" "სტად შაბან-დელმაზე" "ბაიონს" დაუხვდება. ჟირონდელთა მარქაფაშია ლექსო ყაულაშვილი, რომელიც თამაშში მარჯვენა ბურჯის პოზიციაზე გამოჩნდება. ბასკური კლუბის ძირითად შემადგენლობაში პირველად ითამაშებს მეორეხაზელი კონსტანტინე მიქაუტაძე, რომელმაც "აჟენთან" მატჩში შეცვლაზე დასკვნითი 22 წუთი ითამაშა. 

"რასინგ 92" საკუთარ კედლებში "პოს" მიიღებს. პარიზელთა თადარიგშია "ბორჯღალოსანი" მარცხენა ბურჯი გურამ გოგიჩაშვილი, რომელიც მიმდინარე ტოპ 14-ში მეოთხე შეხვედრას ჩაატარებს. მიმდინარე სეზონში სტუმართა განაცხადში პირველად გამოჩნდა მარცხენა ბურჯი ომარ ოდიშვილი, რომელსაც ტოპ 14-ში დებიუტი ექნება. 23 წლის ბურჯს აქამდე "პოს" ძირითად გუნდში მხოლოდ ჩელენჯ ქაფზე აქვს ნათამაშები. 

ორივე მატჩი თბილისის დროით 21:15 საათზე დაიწყება, ხოლო იქამდე 18:15 საათზე "ტულუზი" - "კასტრის" მატჩი შედგება.