სამხრეთ აფრიკის და 6 ერის სპეკულაციები დასრულდა - ბოკე 4 ერში კიდევ 10 წელი ითამაშებს

სამხრეთ აფრიკის ნაკრები 4 ერის გათამაშებაში მინიმუმ 2030 წლამდე იასპარეზებს.

რამდენიმე მიზეზის გამო გასულ თვეში სამხრეთ აფრიკა ავსტრალიაში გასამართი წლევანდელი 4 ერის გათამაშებიდან მოეხსნა, შედეგად წლევანდელ გათამაშებას 3 ერის გათამაშება ეწოდა. მანამდე კი ცნობილი გახდა, რომ სუპერ რაგბის სამხრეთაფრიკული ფრენჩაიზები ბული, შარქსი, სტორმერზი და ლაიონზი გაფართოებულ პრო 16-ში იასპარეზებდნენ. 

აქედან გამომდინარე ბევრი სპეკულაცია არსებობდა იმის შესახებ, რომ "სპრინგბოკსი" 4 ერს დატოვებდა და 6 ერში გადაინაცვლებდა. არსებული ეჭვები დღეს "სანზაარის" განცხადებამ სრულად გაფანტა, საიდანაც ცნობილი გახდა, რომ ორგანიზაციის ოთხივე წევრმა(ახალი ზელანდია, ავსტრალია, სამხრეთ აფრიკა, არგენტინა) თანამშრომლობის კიდევ 10 წლით გახანგრძლივებაზე მიაღწია შეთანხმებას და ეს კი იმას ნიშნავს, რომ ტურნირი 2030 წლამდე აქამდე არსებული ფორმატით გააგრძელებს არსებობას.