ლაშა ტაბიძე ვარჯიშს სავარაუდოდ ხუთშაბათს განაახლებს

© Icon Sport

ტოპ 14-ის მერვე ტურში "ბორდო" "სტად შაბან-დელმაზე" "ბაიონს" დაუხვდება. მატჩი შაბათს 7 ნოემბერს თბილისის დროით 21:15 საათზე დაიწყება. 

ფრანგული გამოცემა sudouest.fr წერს, რომ "ბორდოს" სამშაბათის ვარჯიში ტრავმის გამო რამდენიმე მორაგბემ გამოტოვა და ერთ-ერთი მათგანი "ბორჯღალოსანი" მარჯვენა ბურჯი ლაშა ტაბიძე გახლდათ. როგორც ზემოხსენებული გამოცემა წერს, ლაშამ გასულ კვირას მცირე ტრავმა მიიღო (მუხლის მცირედი დაჭიმულობა) და ამის გამო გუშინაც არ უვარჯიშია, თუმცა სავარაუდოდ, ის ვარჯიშის განახლებას ხუთშაბათს შეძლებს და "ბაიონთან" მატჩისთვის მზადყოფნაში იქნება. 23 წლის ტაბიძემ მიმდინარე ტოპ 14-ში სამი შეხვედრის ჩატარება მოასწრო და თამაშში სამივეჯერ შეცვლაზე ჩაერთო. 

აქვე გეტყვით, რომ ჟირონდელებს ტრავმირებული ჰყავთ კიდევ ერთი მარჯვენა ბურჯი, მოლდოველი ვადიმ კობილაში, რომელიც "ბაიონთან" მატჩს გამოტოვებს.