რამდენმა მილიონმა ადამიანმა უყურა საფრანგეთის მოგებულ მატჩს ირლანდიის წინააღმდეგ?

საფრანგეთის ნაკრებმა გუშინ 6 ერის ბოლო ტურში "სტად დე ფრანსზე" ირლანდია ბონუსით 35:27 დაამარცხა და ტურნირის მოსაგებად მხოლოდ გატანილ-გაშვებული ქულათა ბალანსი დააკლდა, რაშიც ინგლისს ჩამორჩა.

აღნიშნულმა მატჩმა ფრანგ გულშემატკივრებში ძალიან დიდი ინტერესი გამოიწვია. ფრანგულ პრესაში გავრცელებული ინფორმაციის თანახმად, France 2TV-ის პირდაპირ ეთერში საფრანგეთი - ირლანდიის მატჩს 5.6 მილიონმა ადამიანმა უყურა, ხოლო შეხვედრის ჩანაწერის ნახვებსაც თუ მივამატებთ, ეს რიცხვი 6.3 მილიონამდე აღწევს. ამ შეხვედრას დაახლოებით 22.4%-ით ანუ 1.5 მილიონი ადამიანით მეტმა უყურა, ვიდრე ერთი კვირის წინ, უელსთან მოგებულ ტესტ-მატჩს.

ბუნებრივია, რომ საფრანგეთში ამ მატჩის დროს, ზემოხსენებულ ტელევიზიას ყველაზე მეტი ადამიანი უყურებდა. ამ რიცხვის ასეთი ზრდა, შესაძლოა, გამოწვეული იყოს იმ საკარანტინო შეზღუდვებით, რომელიც საფრანგეთში 30 ოქტომბრიდან ამოქმედდა.