6 ერი: ინგლისმა იტალია ბონუსით დაამარცხა, ჩემპიონი ბოლო მატჩში გამოვლინდება (VIDEO)

იტალიის ნაკრები რომში, "სტადიო ოლიმპიკოზე" ინგლისს დაუხვდა და 5:34 დამარცხდა.

"აძურიმ" მრისხანე მეტოქეს პირველ ტაიმში ღირსეული წინააღმდეგობა გაუწია. ინგლისელებმა მატჩის დებიუტში გარდასახული ლელო და ჯარიმა გაიტანეს - ბენ იანგსმა საიუბილეო მეასე კეპი მოიხვეჭა და ეს ფაქტი დუბლით აღნიშნა. მან მეორე ლელოს დადება მეორე ნახევრის დაწყებისთანავე მოახერხა. პირველ ნახევარში კი, ინგლისელებს მეტი ლელო არ დაუდიათ, სამაგიეროდ, ჯეიკ პოლედრიმ დადო მშვენიერი ლელო და ტაიმი 5:10 დასრულდა.

იტალიელებს მეორე ნახევარში და განსაკუთრებით ბოლო 15 წუთში ტრადიციულად გაუჭირდათ. მათ მეორე ტაიმში ოთხი ლელო გაუშვეს, თავად კი ქულების მოპოვება ვერ მოახერხეს. ბენ იანგსის დუბლის გარდა, ინგლისელთაგან ლელოები ჯეიმი ჯორჯმა, ტომ ქარიმ და ჰენრი სლეიდმა დადეს. 

ამრიგად, ინგლისმა 18 ქულა დააგროვა და გატანილ-გაშვებულ ქულათა სხვაობა +44 აქვს. ირლანდიას 14 ქულა აქვს, ხოლო გატანილ-გაშვებული ქულათა სხვაობა +38. იმ შემთხვევაში, თუ ირლანდია საფრანგეთს ბონუსით მოუგებს, ჩემპიონობას გაიფორმებს. გარდა ამისა, ირლანდიელებს 6 ქულით მოგებაც ყოფნით. რაც შეეხება საფრანგეთის შანსებს, "ლე ბლეს" ძალიან მიზერული შანსი აქვს: მათ 13 ქულა აქვთ, გატანილ-გაშვებულ ქულათა სხვაობა კი +13. მათ ჩემპიონობისთვის ბონუსით მოგება სჭირდებათ, თანაც მინიმუმ 31-ქულიანი სხვაობით. 

საფრანგეთი - ირლანდიის მატჩი 00:00 საათზე დაიწყება.