პრო დ2: პარასკევს შვიდი ქართველი მორაგბე ითამაშებს

პარასკევს პრო დ2-ის მერვე ტურის ოთხი შეხვედრა გაიმართება, რომლებშიც შვიდი ქართველი მორაგბე ითამაშებს.

"რუანი" საკუთარ კედლებში "ვალანს რომანს" დაუხვდება. ნორმანდიელთა ძირითად შემადგენლობაშია გამოცდილი მარცხენა ბურჯი კახა ასიეშვილი, ხოლო ვალანსელთა მარქაფაშია მარჯვენა ბურჯი მირიან ბურდული.

"მონტობანი" "ანგულემს" უმასპინძლებს. სტუმართა სასტარტო თხუთმეტეულშია შალვა სუთიაშვილი, რომელიც მეორე ხაზში გაირჯება, ხოლო მარქაფაში არიან ბურჯები ლუკა გოგინავა და ზაურ თევდორაშვილი. 

ეს მატჩები თბილისის დროით 21 საათზე დაიწყება.

"ნევერი" შინ "ვანს" ეთამაშება. მასპინძელთა თადარიგში არიან ბურჯები თორნიკე მატარაძე და გურამ პაპიძე. ეს შეხვედრა 23:45 საათზე დაიწყება.

"კოლომიე" - "პერპინიანი" კი იმის გამო გადაიდო, რომ მასპინძელთა რიგებში კორონავირუსის შემთხვევები გამოვლინდა.