ალან უინ ჯონსი რიჩი მაკქოუს ბრწყინვალე რეკორდს დაამხობს

6 ერის ბოლო ტურის მატჩში უელსის ნაკრები "პარკ სკარლეტსზე" შოტლანდიას დაუხვდება.

ეს მატჩი ისტორიული იქნება, რადგან უელსელთა ლეგენდარული კაპიტანი ალან უინ ჯონსი 149-ე კეპს მოიხვეჭს და ამით სანაკრებო რაგბიში აბსოლუტურ რეკორდს დაამყარებს. ის "ოლ ბლექსის" ლეგენდას რიჩი მაკქოუს გადაუსწრებს და გახდება მორაგბე, რომელსაც სანაკრებო რაგბიში ყველაზე მეტი მატჩი ექნება ჩატარებული. 

ჯონსი უელსის რიგებში 140-ე მატჩს ჩაატარებს, ხოლო 9 კეპი ბრიტანელი და ირლანდიელი ლომების რიგებში აქვს მოხვეჭილი. 

ალან უინ ჯონსის უელსის ნაკრების რიგებში 2006 წლიდან თამაშობს და 139 მატჩში 9 ლელო აქვს გატანილი. მას ოთხ მსოფლიო თასზე (2007, 2011, 2015, 2019) უთამაშია და 21 თამაშში 3 ლელო დადო. ჯონსს ბრიტანელი და ირლანდიელი ლომების სამ ტურნეზე (2009, 2013, 2017) აქვს ნათამაშები და როგორც ვთქვით, აქედან 9 მატჩი სანაკრებო კეპებში ითვლება. ალან უინს მთელი საკლუბო კარიერა "ოსპრისში" აქვს გატარებული და 2005 წლიდან მოყოლებული 245 ჩატარებულ შეხვედრაში 24 ლელო გაიტანა. 

უელსი - შოტლანდიის დაპირისპირება შაბათს თბილისის დროით 18:15 საათზე დაიწყება.