საფრანგეთის ნაკრების შემადგენლობა 6 ერის დასკვნითი მატჩისთვის ცნობილია

საფრანგეთის ნაკრების მთავარმა მწვრთნელმა ფაბიენ გალტიემ 6 ერის დასკვნითი მატჩისთვის, რომელშიც "ლე ბლე" "სტად დე ფრანსზე" ირლანდიას დაუხვდება, შემადგენლობა დაასახელა.

ბოლო ტურის წინ, ჩემპიონობის შანსი სამ გუნდს აქვს: ირლანდიას 14 ქულა აქვს, ხოლო საფრანგეთს და ინგლისს - 13. იმ შემთხვევაში, თუ ირლანდია ბონუსით იმარჯვებს ჩემპიონი სწორედ ის გახდება, მაგრამ ამის გაკეთება ძალიან გაუჭირდება, რადგან "ლე ბლემ" გასულ შაბათს კიდევ ერთხელ დაანახა ქომაგს, რომ ბრწყინვალე ფორმაშია და რომ არა შოტლანდიასთან ნუგეშის ქულის გარეშე მარცხი, რომელიც დიდწილად მოჰამედ აუასის უდისციპლინო თამაშმა გამოიწვია, თავად იქნებოდა ტიტულის მოგების მთავარი ფავორიტი. რაც შეეხება ინგლისის ნაკრებს, ედი ჯონსის გუნდი გასვლაზე იტალიას ეთამაშება და დიდი სხვაობით მოგება არ უნდა გაუჭირდეს.  

"ლე ბლეს" ტედი ტომა დააკლდება, რომელიც უელსთან მოგებულ (38:21) მატჩში დაშავდა. მის ნაცვლად, ძირითად შემადგენლობაში არტურ ვინსენი ითამაშებს, ოღონდ ის შუამარბის პოზიციაზე იასპარეზებს, ხოლო გაელ ფიკუ ფრთაზე გადაინაცვლებს.

საფრანგეთის ნაკრების შემადგენლობა ირლანდიასთან მატჩისთვის ასე გამოიყურება:

უკანა ხაზი

15. ანტონი ბუტიე, 14. ვინსენ რატე, 13. ვირიმი ვაკატავა, 12. არტურ ვინსენი, 11. გაელ ფიკუ, 10. რომან ნტამაკი, 9. ანტუან დუპონი;

შერკინება

1. სირილ ბაილი, 2. ჟულიენ მარშანი, 3. მოჰამედ აუასი, 4. ბერნარდ ლე რუ, 5. პოლ უილემსე, 6. ფრანსუა კროსი, 7. შარლ ოლივონი, 8. გრეგორი ალდრიტი;

მარქაფა

16. კამილ შა, 17. ჟან-ბატისტ გროსი, 18. დემბა ბამბა, 19. რომან ტაოფიფენუა, 20. დილან კრეტინი, 21. ბატისტ სერენი, 22. არტურ რეტიე, 23. ტომა რამოსი;

საფრანგეთი - ირლანდიის მატჩი 31 ოქტომბერს თბილისის დროით 00:00 საათზე დაიწყება.