საფრანგეთის ნაკრები ირლანდიასთან მატჩს მნიშვნელოვანი დანაკლისით ხვდება

ცოტა ხნის წინ ცნობილი გახდა, რომ 6 ერის დასკვნით ტურში ირლანდიის ნაკრებს ვერ დაეხმარება "ლენსტერის" ცენტრი გარი რინგროუზი, როგორც ჩანს მნიშვნელოვანი დანაკლისი აქვთ მათ მოწინააღმდეგე ფრანგებსაც, გავრცელებული ინფორმაციით უელსთან შეხვედრაში ბარძაყის ტრავმა მიიღო გარემარბმა ტედი ტომამ და ზემოთ აღნიშნულ შეხვედრაში მონაწილეობას ვერ მიიღებს.

ტედი ტომა აქამდე კარგ ფორმაში იმყოფებოდა და ირლანდიელებისთვის სერიოზული პრობლემების შექმნა შეეძლო, ფრანგების მდგომარეობას ისიც ამძიმებს, რომ ტრავმირებულია გუნდის მეორე ძირითადი გარემარბი დამიან პენოც. 

ფრანგების დანაკლისი ამით არ სრულდება, უელსთან ძირითად შემადგენლობაში მყოფი ფულბეკი ანტონი ბუტიე ტვინის შერყევის გამო დაისვენებს, ხოლო მეორეხაზელი ბერნარდ ლერუ ალუნ უინ ჯონსისთვის იდაყვის ჩარტყმაშია მხილებული და სავარაუდოდ დისკვალიფიკაციას მიიღებს.