ნიკო აფციაური რუსეთის თასის საუკეთესო მორაგბედ დასახელდა

© Rugby.ru

რამდენიმე დღის წინ გაუწყეთ, რომ რუსულენოვანი სარაგბო პორტალი Rugger.info გამოკითხვას ატარებდა, რომელშიც გულშემატკივარს 2020 წლის რუსეთის თასის საუკეთესო მორაგბე უნდა დაესახელებინა და ნომინანტებში სამი ქართველი მორაგბე გახლდათ წარდგენილი: მიხეილ გაჩეჩილაძე ("ენისეი"), ნიკო აფციაური ("კრასნი იარი") და რობერტ სუთიძე ("კრასნი იარი").

გამოკითხვა გუშინ საღამოს დასრულდა და გამარჯვებული ნიკო აფციაური გახდა, რომელმაც ხმების 56% მიიღო. მეორე ადგილზე რამილ გაისინი გავიდა 19%-ით, ხოლო მიხეილ გაჩეჩილაძეს მესამე ადგილი ერგო და ხმების 15% მოაგროვა. რაც შეეხება რობერტ სუთიძეს, მას გულშემატკივრების 2%-მა დაუჭირა მხარი. 

შეგახსენებთ, რომ ნიკო აფციაური 2019 წელს 7-კაცაში საუკეთესო ქართველ მორაგბედ დასახელდა. 

აქვე გეტყვით, რუსეთის თასის ფინალში "ენისეიმ" "კრასნი იარი" 19:11 დაამარცხა და გადამწყვეტ მატჩში ოთხმა ქართველმა მორაგბემ ითამაშა. "ენისეის" რიგებში სრულად ითამაშა მიხეილ გაჩეჩილაძემ, ხოლო "კრასნი იარის" სასტარტო თხუთმეტეულში იყვნენ რობერტ სუთიძე, ნიკო აფციაური და გიორგი ფრუიძე.