უოსპსს პრემიერშიპის ფინალისთვის 4 მნიშვნელოვანი მორაგბე გამოაკლდა

შაბათს 21:00 საათზე ინგლისის პრემიერშიპის ფინალში ჩემპიონთა თასის გამარჯვებული "ექსეტერ ჩიფსი" "უოსპსს" დაუპირისპირდება.

"უოსპსის" ფინალში მონაწილეობა გუნდში დაფიქსირებული კორონავირუსის შემთხვევების გამო სათუო იყო, იყო შანსი, რომ მათ ნაცვლად "ბრისტოლს" ეთამაშა, თუმცა საბოლოო ტესტირებამ "უოსპსს" ფინალურ შეხვედრაში თამაშის უფლება მისცა. 

როგორც ჩანს ამით მათი განსაცდელი არ ამოწურულა. დღეს გამართულ პრესკონფერენციაზე მთავარმა მწვრთნელმა ლი ბლეკეტმა განაცხადა, რომ გუნდის 23 კაციან განაცხადში 4 ისეთი მორაგბე ვერ იქნება, რომლებსაც რეგულარული სათამაშო პრაქტიკა აქვთ. 

საერთო ჯამში "უოსპსს" კორონავირუსის გამო 11 მორაგბე გამოაკლდა და მწვრთნელს არჩევანის გაკეთება 33 მორაგბეს შორის მოუწია. ბლეკეტს არ დაუსახელებია კონკრეტულად ვინ არიან ის მორაგბეები ვინც თამაშს ვერ შეძლებენ, რადგან სურდა წინასწარ გაემჟღავნებინა დანაკლისის ვინაობა.