მოლდოველი მეორეხაზელი ინგლისის ჩემპიონატში ითამაშებს

როგორც იცით, ჩვენი ვებგვერდი მაქსიმალურად ცდილობს, რომ გააშუქოს საინტერესო ამბები, რომლებიც მეორე და მესამე ეშელონის განვითარებად ქვეყნებს ეხება. ამჯერად მოლდოველი მორაგბის წამყვან ჩემპიონატში გადასვლის შესახებ გაუწყებთ.

29 წლის მეორეხაზელი ანდრეი მაჰუ, რომელსაც მოლდოვის ნაკრებში 24-ჯერ უთამაშია, კარიერას ინგლისის პრემიერშიპში, კონკრეტულად კი "ლონდონ აირიშში" განაგრძობს. ის ახალ კლუბს პრემიერშიპის 2020/2021 წლების სეზონის დაწყებისთანავე შეუერთდება.

"ის მოუტანს გამოცდილებას ჩვენს შერკინებას და შემატებს მეტ სიღრმეს ჩვენს მეორე ხაზს", - განაცხადა "ლონდონ აირიშის" სარაგბო დირექტორმა დექლენ კიდნიმ. 

მაჰუ 2017 წლიდან "კრასნი იარის" ღირსებას იცავდა. აღსანიშნავია, რომ 2014-2015 წლების სეზონში იტალიურ "ძებრეში" თამაშობდა და მაშინდელ პრო 12-ში 6 შეხვედრა ჩაატარა. გარდა ამისა, ის იტალიის ჩემპიონატში "პიაჩენცაში" ასპარეზებოდა, ხოლო რუმინეთის ჩემპიონატში "ტიმიშოარა სარასენსის" და "ფარულ კონსტანცას" ღირსებას იცავდა.