ალი პრაისი: "საქართველოსგან ფიზიკურ ორთაბრძოლას ველოდებით"

შოტლანდიის ნაკრების 9 ნომერმა ალი პრაისმა მოახლოებულ სანაკრებო ბატალიებსა და საქართველოს ნაკრებთან დაპირისპირებაზე ისაუბრა.

"გრძელი 7 თვე გამოდგა. მორაგბეებისთვის სანაკრებო რაგბი ბრწყინვალე მოვლენაა და ძალიან კარგია, რომ ის პარასკევს ბრუნდება. ყველა მის მოლოდინში ვართ. 

9 ნომრის პოზიციაზე გუნდში დიდი კონკურენციაა. 4-5 მორაგბეა რომლებსაც სურთ ძირითად შემადგენლობაში თამაში და გუნდში ყოფნა, რაც ჩვენს ნაკრებზე დადებითად აისახება. 

საქართველოს ნაკრებისგან ფიზიკურ ორთაბრძოლას მოველით. ისინი ფიზიკურად დიდები არიან და შერკინებაში ძლიერი თამაშით გამოირჩევიან. მაგრამ მათ ჰყავთ აგრეთვე ახალგაზრდა ღერძი, რომელსაც თამამად თამაშის არ ეშინია და საკმაოდ ამაღელვებელია. 

ჩვენთვის მთავარია საკუთარ თავზე მოვახდინოთ ფოკუსირება. საქართველოსთან არაერთხელ გვითამაშია და ვიცით მათი ძლიერი მხარეები, ისინი  ფიზიკურად ძლიერი ფორვარდებით ეცდებიან ჩვენი დაცვის გარღვევას" - განაცხადა ალი პრაისმა.

შეგახსენებთ, რომ შოტლანდიის და საქართველოს ნაკრებების ტესტ-მატჩი 23 ოქტომბერს, თბილისის დროით 22:30 საათზე "მარიფილდზე" გაიმართება.