აკადემიამ ვეფხვები დიდი სხვაობით დაამარცხა (ვრცელი ვიდეომიმოხილვა)

© მარიამ გაგნიძე

დიდი 10-ის მეორე ტურში პატარძეულის "ვეფხვები" თელავში თბილისის "აკადემიას" დაუხვდა და დიდი სხვაობით 13:50 დამარცხდა.

არადა მატჩის დასაწყისი ამგვარ სცენარს ნამდვილად არ მოასწავებდა: მეხუთე წუთისთვის ნიკა ბეჟუაშვილის ლელოთი, გარდასახვით და ჯარიმით "ვეფხვები" 10:0 იგებდნენ, მაგრამ ამის შემდეგ "აკადემიამ" ძალიან დიდი უპირატესობა მოიპოვა და მეტოქეს შვიდი უპასუხო ლელო გაუტანა. ნამდვილი ბენეფისი მოიწყო სტუმართა ფულბექმა საბა ილურიძემ, რომელმაც მეტოქეს სამი ლელო გაუტანა და პლუს ორი გარდასახვა შეასრულა ზუსტად. თითო ლელო კი მამუკა მსტოიანის, იოანე ხელაიას, თორნიკე ზოიძის და სანდრო მარგიანის ანგარიშზეა.

"ვეფხვების" აქილევსის ქუსლი კვლავ შერკინებაში თამაში იყო, სადაც ლევან ობოლაძის შეგირდებს უდიდესი უპირატესობა ჰქონდათ და პატარძეულელებს საკუთარი შერკინებიდან ბურთის გამოტანაც კი უჭირდათ. აშკარაა, რომ "ვეფხვებს" ამ კომპონენტზე ბევრი სამუშაო აქვთ, თორემ მომავალში ძალიან გაუჭირდებათ.

მატჩის საუკეთესო მორაგბედ "აკადემიის" მეორეხაზელი ვანო ბერიკაშვილი დასახელდა.