ლევან ჩილაჩავა მონპელიეს დატოვებს, ქართველმა ახალი კლუბი უკვე მონახა

საქართველოს ნაკრების მარჯვენა ბურჯი ლევან ჩილაჩავა მიმდინარე სეზონის ბოლოს "მონპელიეს" დატოვებს - წერს ფრანგული პრესა.

ლევან ჩილაჩავა, რომელმაც შვიდი სეზონი "ტულონში" გაატარა, "მონპელიეს" 2018 წელს შეუერთდა და მასთან კონტრაქტი 2021 წლამდე აკავშირებს. გავრცელებული ინფორმაციის თანახმად, მხარეებს შორის თანამშრომლობა აღარ გაგრძელდება. 

ამავე ინფორმაციით, 29 წლის პირველხაზელს უგუნდოდ დარჩენა არ ემუქრება, რადგან მან "კასტრის" მენეჯერებთან, რომლებიც ახალ მარჯვენა ბურჯს ეძებდნენ, შეთანხმებას მიაღწია. 2021 წლის ივნისში "კასტრის" ორ ბურჯს მეთ ტერნის და დანიელ კოცზეს კონტრაქტები ეწურებათ. შესაბამისად, კლუბის მენეჯერები ახალ მარჯვენა ბურჯს ეძებნენ და 2021/2022 წლების სეზონისთვის ჩილაჩავას დამატება თითქმის გაინაღდეს.       

თუ ეს ტრანსფერი შედგა, ჩილაჩავა ტოპ 14-ის მესამე გუნდის მაისურს მოირგებს.