ზელანდიური მედია: სამხრეთ აფრიკა წლევანდელ 4 ერზე აღარ ითამაშებს

ახალზელანდიური მედიის ინფორმაციით, მოქმედმა მსოფლიო ჩემპიონმა სამხრეთ აფრიკის ნაკრებმა წლევანდელი 4 ერის გათამაშებაში მონაწილეობაზე უარი განაცხადა. 

The New Zeland Herald-ის ინფორმაციით ავსტრალიური და ახალზელანდიური მხარე წლევანდელი ტურნირიდან სამხრეთ აფრიკის ჩახსნის თაობაზე განცხადებას პარასკევს გააკეთებს. შედეგად დაგეგმილი 12 კვირის ნაცვლად 4 ერის გათამაშება 6 კვირის მანძილზე გაიმართება და ტურებს შორის დასვენებაც აღარ იქნება საჭირო. 

შეგახსენებთ, რომ სამხრეთ აფრიკაში რაგბის სულ ცოტახანია რაც განახლდა და გაურკვეველი იყო რამდენად შეძლებდა შარშანდელი ჩემპიონი ტიტულის დაცვისთვის ბრძოლას, რადგან ტურნირისთვის მოსამზადებლად და ფორმაში ჩასადგომად საკმარისი დრო არ ჰქონიათ. აქედან გამომდინარე "სანზაარმა" ცოტა ხნის წინ "სპრინგბოკსს" გადაწყვეტილების მისაღებად დამატებით 48 საათი მისცა და როგორც ჩანს აფრიკელებმა აღარ გარისკეს და ავსტრალიაში გამგზავრებას სახლში დარჩენა ამჯობინეს.

ზემოთ ნახსენები პრობლემების გარდა უნდა ითქვას, რომ აფრიკელებს დიდი საკადრო პრობლემები აქვთ. ტრავმირებული არიან მეორეხაზელები ლუდ დე იახერი და არხი სნეიმანი, ხოლო ებენ ეტზებეთმა სულ ახლახანს მოახერხა გამოჯანმრთელება. გარდა ამისა "სპრინგბოკსისთვის" უდიდესი დანაკლისია ანდრე პოლარდის არყოფნა, რომელმაც "მონპელიეში" თამაშისას მძიმე ტრავმა მიიღო და მოედანს რამდენიმე თვის განმავლობაში ვერ დაუბრუნდება.