ოფიციალურად 6 ერის ბოლო ტურის ცენტრალური მატჩი გადაიდო

6 ერის ოფიციალური ვებგვერდის ცნობით, მეხუთე ტურის ცენტრალური შეხვედრა გადადებულია.

ტურნირის ხელმძღვანელობამ კორონავირუსთან დაკავშირებით რეკომენდაციები მიიღო საფრანგეთის ხელმძღვანელობისგან და ამის საფუძველზე მიიღო გადაწყვეტილება, რომ "სტად დე ფრანსზე" 14 მარტს საფრანგეთი - ირლანდიის დაპირისპირება გადაედო. ჯერჯერობით არაა დადგენილი, გადაიდება თუ არა ამ ქვეყნებს შორის გასამართი ქალთა და 20-წლამდელთა ნაკრებების თამაშები.

რამდენიმე დღის წინ ცნობილი გახდა, რომ იტალიის და ინგლისის ნაკრებების დაპირისპირება უმაყურებლოდ ჩატარდებოდა, თუმცა ბოლო ინფორმაციით, შესაძლოა, ეს მატჩიც გადაიდოს და მხოლოდ უელსი - შოტლანდიის შეხვედრა ჩატარდეს, რომლის გადადებაც ამ მომენტისთვის არ განიხილება. ჩატარდება 20-წლამდელთა მატჩიც, თუმცა გადაიდება ქალთა დაპირისპირება, რადგან შოტლანდიის ნაკრების მოთამაშეს კორონავირუსი დაუდგინდა და კიდევ რამდენიმე წევრი იზოლაციაში იმყოფება.

6 ერი და მასში შემავალი რაგბის კავშირები მჭიდროდ ითანამშრომლებენ იმ თარიღების დასადგენად, რომლებშიც გადადებული მატჩები გაიმართება.