ინგლისელმა მორაგბემ სიმსივნე დაამარცხა და მოედანს დაუბრუნდა

23 წლის ინგლისელმა მორაგბემ ჯონი უილიამსმა სიმსივნე დაამარცხა და მოედანს დაუბრუნდა.

ახალგაზრდა უკანახაზელმა ქიმიური თერაპიის საბოლოო კურსის გაკეთებიდან ოთხ თვეში შეძლო თამაში.

უილიამსს უკანასკნელად ნათამაშები ივნისში, ინგლისის ნაკრებში რიგებში ჰქონდა, როდესაც "წითელმა ვარდებმა" "თვიქნემზე" "ბარბაროსები" 51:43 დაამარცხეს, ხოლო უილიამსმა ლელოს დადება მოახერხა. სამწუხაროდ, მას მსოფლიო თასის ყურება საავადმყოფოდან მოუწია, თუმცა ნოემბერში მკურნალობა წარმატებით დაასრულა და "ნიუკასლ ფალკონსს" დაუბრუნდა, ხოლო შაბათს რაგბს სრულფასოვნად დაუბრუნდა და "დონკასტერთან" მოგებულ (34:10) მატჩში ითამაშა კიდეც.

"ჩვენ მოხარულები ვართ, რომ ის გამოჯანმრთელდა და დაძლია ეს სირთულე. ის ძალიან ბედნიერია, რომ კვლავ რაგბის მოედანზე შეუძლია გასვლა. კლუბისთვის ძალიან კარგია, რომ ერთ-ერთი გამორჩეული მოთამაშე დაუბრუნდა, მაგრამ მთავარი ის არის, რომ ჯონი ნორმალურ ცხოვრებას უბრუნდება, მას შემდგომ, რაც ძალიან რთული პერიოდი გამოიარა" , - განაცხადა "ნიუკასლის" ბოსმა დენ რიჩარდსმა.

გეტყვით, რომ "ნიუკასლი" პრემიერშიპიდან შარშან გავარდა და წელს ჩემპიონშიპში, რვა ტურის შემდეგ ამდენივე მოგება აქვს. მათ 37 ქულა აქვთ და უახლოეს მდევარს, "ქორნიშ პირატსს" 8 ქულით უსწრებენ. ცნობისთვის, ჩემპიონშიპიდან პრემიერშიპში მხოლოდ პირველადგილოსანი გადადის.

23 წლის შუამარბი კი, "ნიუკასლს" 2018 წელს "ლონდონ აირიშიდან შეუერთდა და 17 მატჩში 5 ლელო დადო. მან ითამაშა 2016 წლის მსოფლიოს 20-წლამდელთა ჩემპიონატზეც და 5 მატჩში 3 ლელო გაიტანა, ხოლო ინგლისის ნაკრების კვართი ერთხელ, ზემოხსენებულ "ბარბაროსებთან" მატჩში მოირგო.