შოტლანდიაში რაგბს მე-19 საუკუნიდან თამაშობენ. რაგბის კავშირი ქვეყანაში 1873 წელს დაარსდა და რაგბიში მეორე უძველესი კავშირია. მათი სიმბოლოა მცენარე ნარშავი. შოტლანდიის ნაკრებს 6 ერის წინამორბედი ტურნირები 15-ჯერ აქვს მოგებული, 2000 წლიდან კი, მას შემდეგ, რაც ტურნირს იტალია დაემატა, უკვე 6 ერში მონაწილეობს და აღნიშნული ტურნირი არცერთხელ არ მოუგია. ბოლოადგილოსანი გუნდისთვის განკუთვნილი "ხის კოვზის" მფლობელი კი 4-ჯერ გახდა.

შოტლანდია მსოფლიო თასებზე

შოტლანდიის ნაკრებს აქამდე გამართულ ყველა მსოფლიო თასზე აქვს მონაწილეობა მიღებული. გამართული 8 ჩემპიონატიდან “ნარშავებმა” 7 შემთხვევაში მოახერხეს მეოთხედფინალში გასვლა, ყველაზე წარუმატებული ტურნირი კი 2011 წელს ჰქონდათ, როდესაც ჯგუფური ეტაპის დაძლევა ვერ მოახერხეს. ეს კი ბოლო მატჩში ინგლისთან 12:16 მარცხმა განაპირობა.

შოტლანდიელებს საუკეთსო მსოფლიო თასი 1991 წელს ჰქონდათ, როდესაც მეოთხედფინალში სამოასთან 28:6 გამარჯვების შემდეგ ნახეფარფინალში გააღწიეს. იქ კი ინგლისთან მას შემდეგ დამარცხდნენ, რაც გევინ ჰესტინგსმა მატჩის მიწურულს საკმაოდ ხელსაყრელი პოზიციიდან ჯარიმა ააცილა და მატჩი 6:9 დასრულდა. საბოლოოდ “ნარშავებმა” მესამე ადგილისთვის მატჩში ახალ ზელანდიასთან  6:13 დათმეს და ტურნირი მეოთხე ადგილზე დაასრულეს.

მომდევნო მსოფლიო ჩემპიონატებზე შოტლანდია სტაბილურად ახერხებდა მეოთხედფინალში გასვლას, თუმცა ეს მათი მაქსიმუმი იყო. შოტლანდიას წარმატებული მსოფლიო თასი ჰქონდა 2015 წელს და ძალიან ახლოს იყო კიდევ ერთ ნახევარფინალში გასვლასთან, თუმცა ავსტრალიასთან ბოლო წუთებზე გაშვებული ჯარიმის გამო ტურნირს გამოეთიშნენ.

დღევანდელი მდგომარეობა

მსოფლიო რეიტინგში შოტლანდიელები მე-7 ადგილს იკავებენ წლევანდელ 6 ერზე გუნდმა წინა წლებთან შედარებით არასახარბიელო შედეგები აჩვენა, რაც იმაში გამოიხატება, რომ ნარშავებმა მხოლოდ იტალიის დამარცხება მოახერხეს, წააგეს სამი და ფრედ ითამაშეს ერთი მატჩი. შოტლანდიის ნაკრები წელს მსოფლიო ჩემპიონატზე მონაწილე გუნდებს შორის მეოთხე ადგილზეა უცხოთში დაბადებულ მოთამაშეთა რაოდენობით (14 მოთამაშე). მსოფლიო თასის წინა მოსამზადებელი ეტაპი შოტლანდიელებმა ცუდად დაიწყეს და საფრანგეთთან პირველი მატჩი 3:32 წააგეს, თუმცა შემდეგ მატჩებში მობილიზება მოახერხეს, ჯერ იმავე საფრანგეთს "მარიფილდზე" 17:14 მოუგეს, შემდეგ კი ორ მატჩიან სერიაში საქართველო დაამარცხეს უშანსოდ. შოტლანდია მსოფლიო თასზე A ჯგუფში იასპარეზებს, სადაც მასთან ერთად ირლანდია, იაპონია, სამოა და რუსეთი იქნებიან და მეოთხედფინალში ასპარეზობის  საკმაოდ კარგი შანსი ექნება.

საკვანძო მოთამაშეები

ფინ რასელი - ევროპის ერთერთი საუკეთესო 10 ნომერი, მასთან ერთად და მის გარეშე შოტლანდია სხვა და სხვა გუნდია. რასელს თამაშის საკუთარ თავზე აღება ნებისმიერ დროს შეუძლია,  ამჟამად მშვენიერ ფორმაში იმყოფება და მის კლასში კიდევ ერთხელ დავრწმუნდით თბილისში გამართულ მატჩში, სადაც მისი წინამძღოლობით შოტლანდიამ უშანსოდ დაგვამარცხა.

სტუარტ მაკინალი - შოტლანდიის ნაკრების კვაჭი და გუნდის კაპიტანი, რომელიც ბოლო წლებში გუნდის ლიდერად იქცა და ძალიან სახიფათო მოთამაშეა, კარგად თამაშობს შერკინებაში არის ძლიერი ფიზიკურ ორთაბრძოლებში და საკმაოდ კარგად გამოსდის რაქიდან ბურთის ამოღება.

სტუარტ ჰოგი - შოტლანდიელთა ფულბეკი, რომელიც ევროპაში თავის პოზიციაზე ერთერთი საუკეთესოა, შეიძლება ბოლო პერიოდში საუკეთესო ფორმაში არ არის, თუმცა ბურთით ხელში ნებისმიერ დროს შეუძლია ხაზის გაჭრა და ხიფათის შექმნა, ძალიან კარგად თამაშობს ასევე ფეხით.

საინტერესო ფაქტები შოტლანდიის შესახებ

• შოტლანდიამ პირველი მატჩი ინგლისის წინააღმდეგ ჩაატარა 1871 წელს და იმის გამო, რომ მაშინ ქულების გატანის სისტემა დაყოფილი არ იყო ნომინალურად, "ნარშავებმა" 1:0 იმარჯვეს.
• შოტლანდიას ისტორიაში ყველაზე დიდი ანგარიშით 2004 იაპონია ჰყავს დამარცხებული ანგარიშით 100:8.
• შოტლანდია ყველაზე დიდი ანგარიშით სამხრეთ აფრიკასთან დამარცხდა 1997 წელს - 10:68.
• საუკეთესო მელელოვის სტატუსს იან სმიტი და ტონი სტენჯერი ინაწილებენ 24 ლელოთი.
• "ნარშავების" მაისურით ყველაზე მეტი 110 კეპი ვეტერან კვაჭს როს ფორდს აქვს მოხვეჭილი.
• საუკეთესო მექულე კი კრის პატერსონია 809 ქულით.
• შოტლანდიის ნაკრების კაპიტანი "გლაზგო უორიორსის" კვაჭი სტუარტ მაკინალია, მთავარი მწვრთნელი კი შოტლანდიელი გრეგორ თაუნსენდი.
• შოტლანდიის უპრინციპულეს მეტოქეს წარმოადგენს ინგლისის ნაკრები, რომელთანაც ყველაზე მეტი მატჩი აქვს გამართული, მათ შორის 1879 წლიდან თამაშდება თამაშდება ტრადიციული კალკუტას თასი, რომელიც შოტლანდიამ 40-ჯერ მოიგო, ხოლო ინგლისმა 70-ჯერ. საერთო ჯამში კი ამ ორ გუნდს შორის 137 მატჩი გაიმართა, რომელთაგან 43-ჯერ გამარჯვება შოტლანდიას დარჩა, 75-ჯერ ინგლისს, 19 მატჩი კი ფრედ დასრულდა.
• შოტლანდიის ნაკრებს აქამდე 694 მატჩი აქვს ჩატარებული ,საიდანაც 298 მატჩი მოიგო, 363-ჯერ დამარცხდა და 33 შემთხვევაში მატჩი ფრედ დაასრულა.