ირლანდიაში რაგბს მე-19 საუკუნის მეორე ნახევრიდან თამაშობენ. პოლიტიკურად ირლანდია ორ ნაწილად ჩრდილოეთ და სამხრეთად არის გაყოფილი, თუმცა რაგბიში ორივე მხარე ერთიანდება და ერთ ნაკრებს წარმოადგენს. რაგბის კავშირი ირლანდიელებმა 1874 წელს დაარსეს. პირველი ოფიციალური მატჩი კი მომდევნო წელს ინგლისის წინააღმდეგ გამართეს. გუნდს ზედმეტსახელად "სამყურებს" უწოდებენ. შოტლანდიის მსგავსად, ირლანდიაც მონაწილეობას იღებდა 6 ერის წინამორბედ ტურნირებში, სადაც 1883 წლიდან ჩაერთო. ამ ხნის მანძილზე “სამყურებმა” 10-ჯერ მოახერხეს ტურნირის მოგება, ხის კოვზი კი 36-ჯერ ერგოთ. 2000 წლიდან მონაწილეობას იღებენ 6 ერის გათამაშებაში, რომლის ჩემპიონებიც 4-ჯერ გახდნენ მათ შორის 2-ჯერ სლემით (ტურნირზე ყველა მატჩის მოგება).

ირლანდია მსოფლიო თასებზე

ირლანდიის ნაკრებს აქამდე გამართულ ყველა მსოფლიო თასზე აქვს მონაწილეობა მიღებული და ჯგუფიდან გასვლა მხოლოდ ორ შემთხვევაში 1999 და 2007 წლებში ვერ მოახერხა. 1987 წელს “სამყურები” ჯგუფში მეორე ადგილას გავიდნენ, მეოთხედფინალში კი ავსტრალიასთან 15:33 დამარცხდნენ და ტურნირს გამოეთიშნენ.

იგივე განმეორდა 4 წლის შემდეგაც, მეორე ადგილზე გასული ირლანდიელები მეოთხედფინალში კვლავ ავსტრალიას გადაეყარნენ და ამჯერად 18:19 დათმეს შეხვედრა. 1995 წელს ირლანდია მეოთხედფინალში უკვე საფრანგეთმა გამოთიშა ტურნირიდან - 12:36. "სამყურებმა" ტრადიცია არც მომდევნო ორ მსოფლიო თასზე დაარღვიეს და ჯგუფში ორჯერვე მეორე ადგილი დაიკავეს, თუმცა 1999 წლის მსოფლიო თასზე თანაბარი ქულების პირობებში, მაშინ არსებული სისტემის გამო, მეოთხედფინალში გადასასვლელი პლეი-ოფის მატჩში არგენტინასთან შეხვედრა 24:28 დათმეს და ტურნირს გამოეთიშნენ. 2003 წელს კი ირლანდია ტურნირს კვლავ საფრანგეთმა გამოთიშა 21:43.

საფრანგეთში გამართულ მსოფლიო თასი წარუმატებელი გამოდგა და ტურნირს ჯგუფურ ეტაპზევე გამოეთიშნენ. რაც შეეხება 2011 და 2015 წლებს, ჯგუფში ორივე შემთხვევაში პირველი ადგილის დაკავების მიუხედავად, მეოთხედფინალის ბარიერის გადალახვა ვერც ამჯერად მოახერხეს. პირველ შემთხვევაში ირლანდიელები უელსთან დამარცხდნენ 10:22, ხოლო 2015 წელს კი არგენტინასთან - 20:43.

დღევანდელი მდგომარეობა

ირლანდიელებმა ბრწყინვალედ ჩაატარეს 2018 წელი, დიდი სლემით მოიგეს 6 ერი, ხოლო ნოემბერში კი ახალი ზელანდია დაამარცხეს ისტორიაში მეორედ. ამის შემდეგ, "სამყურებმა" 2019 წლის 6 ერზე იმ ხარისხის თამაში ვეღარ აჩვენეს და მესამე ადგილს დასჯერდნენ.დაიწყო საუბარი გუნდის კრიზისზე და ფორმიდან ამოვარდნაზე. მსოფლიო თასის მოსამზადებელ ამხანაგურ მატჩში სამყურები ინგლისთან 57:15 განადგურდნენ, თუმცა შემდეგ უელსის ზედიზედ ორჯერ დამარცხებით ისტორიაში პირველად მოექცნენ მსოფლიო რეიტინგის სათავეში და იაპონიის მსოფლიო თასს ამაღლებული განწყობით ხვდებიან.

საკვანძო მოთამაშეები

ირლანდიას დღეისთვის არსებობის მანძილზე ყველაზე დაბალანსებული და ძლიერი შემადგენლობა ჰყავს. მათი შერკინებიდან გამოსარჩევია ტად ფარლონგი, ჯეიმს რაიანი და პიტერ ომაჰონი. მიუხედავად ასაკისა კვლავ სტაბილურია რორი ბესტი, რომელიც გუნდის კაპიტანია. უკანა ხაზიდან გამოსარჩევია ქონორ მარი, ჯონათან სექსტონი და აგრეთვე ჯეოკობ სტოკდეილი, რომელსაც არაფრიდან შეუძლია ლელოს შექმნა.

საინტერესო ფაქტები ირლანდიის შესახებ

• ირლანდიის ნაკრებმა პირველი სანაკრებო მატჩი 1875 წელს  ჩაატარა ინგლისის წინააღმდეგ და 0:7 დამარცხდა.
• ირლანდიას ყველაზე დიდი ანგარიშით ამერიკის ნაკრები ჰყავს დამარცხებული 2000 წელს ანგარიშით 83:3.
• თავად სამყურები ყველაზე დიდი სხვაობით ახალ ზელანდიასთან დამარცხდნენ 2012 წელს ანგარიშით 60:0.
• ნაკრების საუკეთესო მელელოვე ლეგენდარული ცენტრი ბრაიან ო'დრისკოლია 46 ლელოთი.
• აგრეთვე ყველაზე მეტი მატჩიც ბრაიან ო'დრისკოლს აქვს ჩატარებული - 133. .
• საუკეთესო მექულე რონან ოგარაა 1093 ქულით.
• სამყურების  კაპიტანი 37 წლის რორი ბესტია, მთავარი მწვრთნელი კი ახალ ზელანდიელი ჯო შმიდტი.
• ირლანდიის ნაკრებს ისტორიის მანძილზე ყველა გრანდი ყავს დამარცხებული, მათ შორის ახალი ზელანდია ორჯერ. ყველაზე მეტი 135 მატჩი ირლანდიელებს ინგლისთან და შოტლანდიასთან უთამაშიათ. ინგლისთან 49 შეხვედრაში გამოვიდნენ გამარჯვებულები, 78-ჯერ დამარცხდნენ და 8 ფრე ითამაშეს. რაც შეეხება შოტლანდიას, აღნიშნული მეტოქე 63-ჯერ დაამარცხეს, 67-ჯერ თავად დამარცხდნენ და 5 მატჩი ფრედ დაასრულეს.
• ირლანდიის ნაკრებს სულ 699 მატჩი აქვს გამართული, საიდანაც 315 მოიგო, 352-ჯერ დამარცხდა და 32 მატჩი ფრედ დაასრულა.