სხვა ტურნირები - Myrugby.ge - რაგბი საქართველო

🏉 1vs1 რაგბის მსოფლიო სერია – თბილისი 2025

ramazi — Fri, 17 Oct 2025 03:14:51 +0400

სისწრაფე, ძალა და სტრატეგია – მხოლოდ ერთი გახდება გამარჯვებული! ⚡

2025 წელს თბილისი მასპინძლობს უნიკალურ საერთაშორისო ღონისძიებას —
1vs1 რაგბის მსოფლიო სერიის საკვალიფიკაციო ტურნირებს,
სადაც საქართველოს საუკეთესო მოთამაშეები შეხვდებიან მსოფლიოს წარმომადგენლებს, რათა დაამტკიცონ თავიანთი უნარები ერთ-ერთ ყველაზე დინამიკურ და სანახაობრივ ფორმატში.

🌍 1vs1 რაგბი – ახალი ფორმატი, ახალი ენერგია

1vs1 რაგბი არის ინოვაციური ფორმატი, სადაც ორი მოთამაშე ერთმანეთს ეჯიბრება ერთ-ერთზე – სისწრაფეში, ტაქტიკაში, ფიზიკურ გამძლეობასა და გონებრივ სიმტკიცეში.
თამაში ტარდება ნამდვილი ბალახის მინდორზე, რაც მოითხოვს მაქსიმალურ სიზუსტეს, სისწრაფეს და სტრატეგიულ აზროვნებას.

თითოეული მატჩი მოკლეა, ინტენსიური და დამუხტული ემოციით —
სწორედ ამიტომ 1vs1 რაგბი იქცა ახალ სპორტულ გამოწვევად და შოუ-ფორმატად, რომელიც უკვე იპყრობს მსოფლიოს სპორტული მედიის ყურადღებას.

🏆 კაცთა ტურნირი – 2 ნოემბერი, 2025

🔥 დროა დაამტკიცო შენი სიძლიერე და მოიპოვო მსოფლიო ფინალის ბილეთი!

📍 ადგილმდებარეობა: სტადიონი “ლოკომოტივი”, თბილისი
🗓 თარიღი: 2025 წლის 2 ნოემბერი
🕑 დაწყება: 14:00

კაცთა ტურნირი იქნება ძალის, სისწრაფისა და ტაქტიკის ნამდვილი გამოცდა.
მოთამაშეებს ელით საერთაშორისო მასშტაბის კონკურენცია,
სადაც გამარჯვებული მოიპოვებს ბილეთს მსოფლიო ფინალზე და მთავარ ჯილდოს – თორის ჩაქუჩს 🪓!

Pitbull West Coast წარმოადგენს ტურნირის მთავარ სპონსორს და გამარჯვებულებს სთავაზობს განსაკუთრებულ პრიზებს.

🎯 პრიზები:
🥇 I ადგილი – 500$ + ბილეთი ფინალზე + საჩუქრები
🥈 II ადგილი – 300$ + საჩუქრები
🥉 III ადგილი – 200$ + საჩუქრები

⚡ Only ONE Will WIN! ⚡

💪 ქალთა ტურნირი – 1 ნოემბერი, 2025

✨ მსოფლიოს ერთ-ერთი ყველაზე ამაღელვებელი ტურნირი ქალებისთვის იწყება თბილისიდან!

📍 ადგილმდებარეობა: სტადიონი “ლოკომოტივი”, თბილისი
🗓 თარიღი: 2025 წლის 1 ნოემბერი
🕑 დაწყება: 14:00

ქალთა ტურნირი წარმოადგენს შანსს, აჩვენო შენი ძალა, სისწრაფე და ხასიათი მსოფლიო სცენაზე.
1vs1 ფორმატი აქცევს თითოეულ მატჩს ნამდვილ ბრძოლად,
სადაც ერთი შეცდომა ან ერთი ბრწყინვალე მოძრაობა წყვეტს ყველაფერს.

მთავარი მიზანი?
ფინალის ბილეთი 2026 წლის მსოფლიო ჩემპიონატზე! 🏆

📲 როგორ დარეგისტრირდე

👉 რეგისტრაცია ღიაა ყველასთვის, ვისაც სურს გამოცადოს საკუთარი შესაძლებლობები საერთაშორისო მასშტაბის ტურნირში.

📱 დარეგისტრირდი და მოგვყევი:

Facebook: 1vs1Rugby
Instagram: @1vs1Rugby

🎯 რატომ უნდა მიიღო მონაწილეობა

🌍 საერთაშორისო აღიარება — შანსი წარმოადგინო საქართველო მსოფლიო სერიაში
🏉 უნიკალური გამოცდილება — 1vs1 ფორმატი განსხვავდება ტრადიციული რაგბისგან
🏆 რეალური პრიზები და ფინალზე გასვლის შესაძლებლობა
🤝 ახალი სპორტული კავშირები და საერთაშორისო ურთიერთობები

⚡ დასკვნა

1vs1 რაგბის მსოფლიო სერია თბილისიდან იწყება!
ეს არის შანსი სპორტსმენებისთვის, ვისაც სჯერა საკუთარი ძალის,
ვისაც სურს გამორჩეს და გახდეს მსოფლიო სცენის ნაწილი.

💥 გამოდი მოედანზე. იბრძოლე. აჩვენე შენი სული.
🏆 Only ONE Will WIN!

თელ-ავივ ჰითი შავ ლომთან მატჩისთვის ხვამლი არენაზე ემზადება (VIDEO)

ika — Wed, 13 Oct 2021 23:31:44 +0400

16 ოქტომბერს 17 საათზე ავჭალის სარაგბო სტადიონზე ერთმანეთს ქართული "შავი ლომი" და ებრაული "თელ-ავივ ჰითი" დაუპირისპირდებიან, რომლებიც ახალ რაგბი ევროპის სუპერ თასზე პირველ შეხვედრას ჩაატარებენ.

როგორც მოგეხსენებათ, მატჩი სექტემბერში უნდა გამართულიყო, თუმცა ეპიდემიოლოგიური ვითარებიდან გამომდინარე, შეხვედრა 16 ოქტომბრისთვის გადაიდო. უნდა აღინიშნოს, რომ ორივე ქვეყნის რაგბის კავშირმა პირველად მოახერხა პროფესიონალური ფრენჩაიზის შექმნა და ამრიგად, ორივე მხარისთვის ამ შეხვედრას უდიდესი მნიშვნელობა აქვს.

ებრაელებმა ნაყოფიერი შეკრება სამხრეთ აფრიკაში გაიარეს, საიდანაც რამდენიმე დღის წინ გეზი საქართველოსკენ აიღეს და მოახლოებული მატჩისთვის, თბილისში, კონკრეტულად კი "ხვამლი არენაზე" ემზადებიან. უნდა აღინიშნოს, რომ "თელ-ავივ ჰითს" საკმაოდ ძლიერი შემადგენლობა ჰყავს და ის ძირითადად უცხოელი მორაგბეებით არის დაკომპლექტებული. მათ შორის არიან - ფიჯელი, სამხრეთაფრიკელი, ინგლისელი, ნამიბიელი და ახალზელანდიელი მორაგბეები, რომელთაც საკმაოდ მაღალ დონეზე თამაშის გამოცდილება გააჩნიათ.

გთავაზობთ ებრაელთა ვარჯიშის კადრებს "ხვამლი არენადან", რომელიც ფრენჩაიზმა ფეისბუქ გვერდზე გამოაქვეყნა.

ახალი ზელანდიის 7-ქალა ნაკრები ოლიმპიური ჩემპიონია!

ika — Sat, 31 Jul 2021 14:12:03 +0400

ტოკიოში მიმდინარე ოლიმპიადაზე 7-ქალა რაგბის ტურნირი ახალი ზელანდიის ტრიუმფით დასრულდა.

ტურნირის დასკვნით სათამაშო დღეს ნახევარფინალური მატჩები გაიმართა. დრამატული გამოდგა ახალი ზელანდიის და ფიჯის დაპირისპირება. ბოლო წუთისთვის ფრე იყო, რა დროსაც"შავმა გვიმრებმა" ლელო გაიტანეს და გამარჯვებისკენ ძალიან დიდი ნაბიჯი გადადგეს, მაგრამ ფიჯელებმა გაწითლებულ დროში საპასუხო ლელო მიითვალეს და ძირითადი დრო ფრედ 17:17 დასრულდა, დამატებით დროში კი ახალზელანდიელებმა გადამწყვეტი ლელო დადეს, 22:17 იმარჯვეს და ფინალში გავიდნენ. მეორე ნახევარფინალურ შეხვედრაში საფრანგეთმა დიდი ბრიტანეთი გაცილებით იოლად 26:19 დაამარცხა.

ფინალურ მატჩში ახალმა ზელანდიამ გაცილებით მარტივად იმარჯვა, ვიდრე ნახევარფინალში. "შავმა გვიმრებმა" ფრანგი გოგონები 26:12 დაამარცხეს და ოლიმპიური ოქროს მფლობელები გახდნენ. მე-3 ადგილისთვის მატჩში კი ფიჯიმ დიდ ბრიტანეთს 21:12 სძლია და ბრინჯაოს მედლები მოიპოვა.

მე-5 ადგილი დაიკავა ავსტრალიამ, რომელმაც ჯერ რუსეთის ოლიმპიური კომიტეტი 35:7 დაამარცხა, შემდეგ კი აშშ-ს 17:7 სძლია. მე-7 ადგილი კი ჩინეთმა დაისაკუთრა, რომელმაც აშშ-სთან 14:33 მარცხის შემდეგ, რუსეთის ოლიმპიურ კომიტეტს 22:10 მოუგო. კანადამ მე-9 ადგილისთვის მატჩში კენიას 24:10 აჯობა, ხოლო მე-11 ადგილისთვის შეხვედრაში ბრაზილიამ მასპინძელ იაპონიას 21:12 სძლია.

7-ქალა, ოლიმპიადა - მოქმედი ჩემპიონი ნახევარფინალს მიღმა დარჩა

ika — Fri, 30 Jul 2021 17:02:13 +0400

დღეს ტოკიოში მიმდინარე ოლიმპიადაზე 7-ქალა რაგბის ჯგუფური ეტაპის დასკვნითი მატჩები და პლეი-ოფის პირველი შეხვედრები გაიმართა.

A ჯგუფის ბოლო ტურში ახალმა ზელანდიამ რუსეთის ოლიმპიური კომიტეტი 33:0 დაამარცხა და პირველი ადგილი დაიკავა, ხოლო დიდმა ბრიტანეთმა კენიას 31:0 სძლია და მეორე პოზიცია დაიკავა. რუსეთის ოლიმპიური კომიტეტი კი ორ საუკეთესო მეორე ადგილოსანს შორის მოხვდა და პლეი-ოფში გავიდა.

B ჯგუფში საფრანგეთმა კანადა იოლად 31:0 დაამარცხა და პლეი-ოფში პირველი ადგილით გავიდა, ფიჯიმ კი ბრაზილიას დიდი ანგარიში 41:5 აჯობა და მეორე საფეხური დაიკავა. კანადამ მესამე ადგილოსნებს შორის უარესი შედეგი აჩვენა და მეოთხედფინალში ვერ გავიდა.

C ჯგუფში 2016 წლის ოლიმპიური ჩემპიონი ავსტრალია აშშ-სთან 12:14 დამარცხდა, ხოლო ჩინეთმა იაპონიას 29:0 აჯობა და საუკეთესო მესამე ადგილოსნის სტატუსით მეოთხედფინალში გააღწია.

პლეი-ოფის პირველ მატჩებში მოქმედი ჩემპიონი ავსტრალია ფიჯისთან 12:14 დამარცხდა და ნახევარფინალს მიღმა დარჩა, შესაბამისად 7-ქალას ახალი ოლიმპიური ჩემპიონი ეყოლება. ახალი ზელანდია კვლავ რუსეთის ოლიმპიურ კომიტეტს შეხვდა და ამჯერად უფრო დიდი ანგარიშით 36:0 აჯობა, დიდმა ბრიტანეთმა აშშ 21:12 დაამარცხა, ხოლო საფრანგეთმა ჩინეთს 24:10 სძლია. 9-12 ადგილებისთვის მატჩში კანადამ ბრაზილია 45:0 გაანადგურა, კენიამ კი იაპონიას 21:17 მოუგო.

ხვალ 7-ქალას დასკვნითი სათამაშო დღე გაიმართება. თბილისის დროით დილის 04:00 საათზე მე-11 ადგილისთვის მატჩში ერთმანეთს მასპინძელი იაპონია და ბრაზილია შეერკინებიან, ნახევარ საათში კი მე-9 ადგილისთვის რკენაში კანადა და კენია მოსინჯავენ ძალებს.

ამის შემდეგ, 5-8 ადგილებისთვის მატჩში 05:00 საათზე ავსტრალია რუსეთის ოლიმპიურ კომიტეტს შეხვდება, ნახევარ საათში კი აშშ-ის და ჩინეთის ჯახს ვიხილავთ. 06:00 საათზე პირველი ნახევარფინალური მატჩი შედგება, რომელშიც ფიჯი ახალ ზელანდიას დაუპირისპირდება და "შავ გვიმრებს" შანსი ექნებათ, რომ 7-კაცას ფინალში განცდილი მარცხისთვის ფიჯელებს რევანში აუღონ. 06:30 საათზე მეორე ნახევარფინალში დიდი ბრიტანეთი საფრანგეთს ეთამაშება.

ფინალური ბლოკი 11:30 საათზე დაიწყება. ბრინჯაოს მედლისთვის მატჩი 12:30 გაიმართება, ხოლო ფინალური შეხვედრა 13:00 საათზე დაიწყება.

7-ქალა, ოლიმპიადა - პირველ დღეს უდანაკარგოდ ოთხმა ნაკრებმა იასპარეზა

ika — Thu, 29 Jul 2021 16:04:53 +0400

დღეს ტოკიოში მიმდინარე ოლიმპიადაზე 7-ქალა რაგბის შეჯიბრმაც აიღო სტარტი, რომელშიც 12 ქვეყანა მონაწილეობს.

პირველ დღეს ჯგუფური ეტაპის ორი ტურის მატჩები გაიმართა.

A ჯგუფს ახალი ზელანდიის ნაკრები ლიდერობს, რომელმაც პირველ ტურში კენიას 29:7 აჯობა, ხოლო მთავარ კონკურენტ დიდ ბრიტანეთს 26:21 აჯობა. დიდმა ბრიტანეთმა მეორე მატჩში რუსეთის ოლიმპიური კომიტეტი დაამარცხა, თუმცა ამის გაკეთება ძალიან გაუჭირდა. პირველი ტაიმი ბრიტანელთა გამარჯვებით 7:5 დასრულდა, თუმცა მატჩის დასრულებამდე ორი წუთით ადრე რუსებმა გარდასახული ლელო გაიტანეს და ხუთი ქულით გავიდნენ წინ, ბრიტანელებმა გამარჯვების მომტანი გარდასახული ლელო გაწითლებულ დროში გაიტანეს და 14:12 იმარჯვეს. რუსმა გოგონებმა მეორე მატჩში კენია დიდი სხვაობით 35:12 დაამარცხეს.

B ჯგუფს ორიდან ორი გამარჯვებით საფრანგეთი ჩაუდგა სათავეში. ფრანგებმა პირველ მატჩში ფიჯი მძიმე ბრძოლაში 12:5 დაამარცხეს, ხოლო ბრაზილიას იოლად 40:5 სძლიეს. ფიჯელებმა მეორე მატჩში კანადას 26:12 აჯობეს, ხოლო კანადამ ბრაზილიას 33:0 სძლია.

C ჯგუფში ორხელისუფლებიანობაა. ავსტრალიამ ჩინეთს 26:10 მოუგო, იაპონია კი 48:0 გაანადგურა. აშშ-მა ჩინეთს 28:14 აჯობა, ხოლო იაპონიას 17:7 სძლია.

ხვალ ჯგუფური ეტაპის ბოლო ტურის მატჩები გაიმართება, შემდეგ კი პლეი-ოფების პირველი მატჩები შედგება, ხოლო ზეგ 31 ივლისს ფინალურ ბლოკს ვიხილავთ და მედლების მფლობელები გამოვლინდებიან.

ფიჯელი მორაგბეების ემოციური სიმღერა ოლიმპიური ოქროს მოპოვების შემდეგ (VIDEO)

ika — Wed, 28 Jul 2021 22:37:40 +0400

ფიჯის 7-კაცა ნაკრებმა ტოკიოში მიმდინარე ოლიმპიადაზე ბრწყინვალედ იასპარეზა, ფინალურ მატჩში ახალი ზელანდია დამაჯერებლად 27:12 დაამარცხა და ოლიმპიური ოქროს მედლები ზედიზედ მეორედ მოიპოვა.

ოქროს მედლების მოპოვების და დაჯილდოების ცერემონიალის დასრულების შემდეგ, ფიჯელმა მორაგბეებმა თავიანთი ბრწყინვალე წარმატება ემოციური სიმღერით აღნიშნეს, რაც სოციალურ ქსელში მალევე გავრცელდა და გულშემატკივრებს შორის დიდი მოწონება დაიმსახურა.

ზედიზედ მეორედ - ფიჯის 7-კაცა ნაკრები ოლიმპიური ჩემპიონია! (VIDEO)

ika — Wed, 28 Jul 2021 16:47:35 +0400

ფიჯის 7-კაცა ნაკრებმა ზედიზედ მეორედ ოლიმპიადის მოგება მოახერხა! 2016 წელს რიო-დე-ჟანეიროში მოპოვებული ოქროს მედლების შემდეგ, "მფრინავმა ფიჯელებმა" მოქმედი ჩემპიონის სტატუსით იასპარეს, ტიტული დაიცვეს და ქვეყანას კვლავ ოქროს მედლები მოუპოვეს.

ფიჯელებმა ჯგუფურ ეტაპზე იაპონია (24:19), კანადა (28:14) და დიდი ბრიტანეთი (33:7) დაამარცხეს, მეოთხედფინალში ავსტრალიას იოლად 19:0 სძლიეს, ნახევარფინალში არგენტინას 26:14 სძლიეს, ხოლო ფინალურ მატჩში ახალ ზელანდიას 27:12 აჯობეს. "მფრინავმა ფიჯელებმა" ფინალურ მატჩში თავიდანვე უპირატესობა მოიპოვეს და ორი ლელო მიითვალეს, შემდეგ კი "კივებმაც" გაიბრძოლეს და ტაიმი 19:12 დასრულდა, მეორე ნახევარში კი ფიჯიმ უპირატესობა განიმტკიცა და კიდევ ორი უპასუხო ლელო გაიტანა.

ამრიგად, ფიჯის 7-კაცა ნაკრებმა ფიჯელთა ოლიმპიური დელეგაციას პირველი მედალი მოუპოვა და ამ მომენტისთვის, ისინი ოლიმპიური მედლების საერთო რეიტინგში 28-ე ადგილზე იმყოფებიან.

აქვე გეტყვით, რომ მესამე ადგილისთვის მატჩში არგენტინამ დიდი ბრიტანეთი 17:12 დაამარცხა და ბრინჯაოს მედლებს დაეუფლა, რაც "პუმებისთვის" ისტორიული შედეგია. აღსანიშნავია, რომ ეს მედალი არგენტინელთა დელეგაციისთვისაც პირველი გამოდგა და ისინი საერთო რეიტინგში 56-ე პოზიციას იკავებენ.

ხვალ 7-ქალა რაგბის ოლიმპიური ტურნირი აიღებს სტარტს, რომელიც 31 ივლისამდე გაგრძელდება.

სამხრეთ აფრიკის 18-წლამდელთა ნაკრები საქართველოს ოთხი მატჩის გასამართად ესტუმრება

ika — Mon, 26 Jul 2021 23:23:59 +0400

სამხრეთ აფრიკის 18-წლამდელთა ნაკრები აგვისტოში საქართველოს ესტუმრება - აღნიშნული ინფორმაცია სამხრეთ აფრიკის რაგბის კავშირის ოფიციალურმა ვებგვერდმა დაადასტურა.

აფრიკელთა 18-წლამდელთა გუნდს ქართულ ტურნეზე კატლეჰო ლინჩთან და მის ასისტენტ კობუს ვან დაიკთან ერთად, სამხრეთ აფრიკის 20-წლამდელთა ნაკრების მთავარი მწვრთნელი ბაფანა ნჰლეკო უხელმძღვანელებს. მწვრთნელებმა უკვე შეარჩიეს ის 38 მორაგბე, რომლებსაც საქართველოში წაიყვანენ.

როგორც განცხადებაშია ნათქვამი, სამხრეთ აფრიკის და საქართველოს 18-წლამდელთა ნაკრებები ერთმანეთს 4,7,11 და 14 აგვისტოს ეთამაშებიან.

სამხრეთ აფრიკის 18-წლამდელთა ნაკრები საქართველოში ასეთი შემადგენლობით ჩამოვა:

7-კაცა, ოლიმპიადა - ახალი ზელანდია A ჯგუფს უდანაკარგოდ ლიდერობს, ავსტრალია არგენტინასთან დამარცხდა

ika — Mon, 26 Jul 2021 18:04:58 +0400

დღეს ტოკიოში მიმდინარე ოლიმპიადაზე 7-კაცა რაგბის შეჯიბრმაც აიღო სტარტი, რომელშიც 12 ქვეყანა მონაწილეობს.

პირველი ორი ტურის შემდეგ, ყველაზე დაძაბული მდგომარეობა A ჯგუფშია, სადაც განსხვავებით სხვა ოთხეულებისგან, მხოლოდ ერთი ლიდერია გამოკვეთილი - ახალი ზელანდია, რომელმაც სამხრეთ კორეა 50:5 გაანადგურა, ხოლო არგენტინას 35:14 აჯობა. სამაგიეროდ, არგენტინის ნაკრებმა ავსტრალიას სძლია 29:19 და დარჩენილი მატჩი ხვალ აუტსაიდერ სამხრეთ კორეასთან უწევს, რომელიც ავსტრალიასთან 5:42 დამარცხდა. "კენგურუები" ხვალ ახალ ზელანდიას შეერკინებიან და დიდი შანსია, რომ მეორე ადგილი დაკარგონ.

ახალი ზელანდია - სამხრეთ კორეა 50:5

აქვე იხილეთ - რაგბი 7-ის ოლიმპიადის სრული განრიგი

7-კაცა, ოლიმპიადა - სამხრეთ აფრიკა და აშშ C ჯგუფს ორიდან ორი გამარჯვებით ლიდერობენ

ika — Mon, 26 Jul 2021 17:51:41 +0400

დღეს ტოკიოში მიმდინარე ოლიმპიადაზე 7-კაცა რაგბის შეჯიბრმაც აიღო სტარტი, რომელშიც 12 ქვეყანა მონაწილეობს.

C ჯგუფს ორიდან ორი გამარჯვებით სამხრეთ აფრიკა და აშშ ლიდერობენ. სამხრეთ აფრიკამ პირველ ტურში ირლანდია 33:14 დაამარცხა, მეორე შეხვედრაში კი კენიას 14:5 სძლია. კენია ასევე მცირე სხვაობით 14:19 დამარცხდა აშშ-სთან. ამერიკელებმა ასევე მიზერული სხვაობით 19:17 აჯობეს ირლანდიას.

ხვალ ერთმანეთს ჯგუფის ლიდერები და აუტსაიდერები ეთამაშებიან, შემდეგ კი პლეი-ოფები დაიწყება, რომელიც ხვალ დღის მეორე ნახევარში და ზეგ გაიმართება.

აშშ - ირლანდია 19:17
აქვე იხილეთ - რაგბი 7-ის ოლიმპიადის სრული განრიგი