ეროვნული ნაკრები - Myrugby.ge - რაგბი საქართველო

საქართველოს ეროვნული ნაკრების შემადგენლობა 2024 წლის ერთა თასზე

Fabrizio — Mon, 29 Jan 2024 00:32:36 +0400

როგორც მოსალოდნელი იყო 2024 ის ერთა თასისთვის ახალმა მწვრთნელმა, დატოვებულ შემადგენლობაში ცვლილებები შეიტანა და ერთბაშად 11 დებიუტანტს უხმო .

როგორც იცით რიჩარდ კოკერილი ახლახან დაინიშნა საქართველოს ეროვნული ნაკრების მთავარი მწვრთნელის პოსტზე და მან ლევან მაისაშვილი ჩაანაცვლა . კულუარული ინფორმაციების მიხედვით ლევან მაისაშვილს დააწინაურებენ და მაღალი განვითარების მენეჯერად დანიშნავენ რაგბის კავშირში (ჯერ ეს ინფორმაცია არ დადასტურებულა )

დებიუტანტებიდან უმრავლესობა შავი ლომის შემადგენლობიდან არის , ესენი არიან ბურჯები დავით აბდუშელიშვილი, გიორგი მამაიაშვილი, გიორგი ახალაძე, გიორგი ქართველიშვილი, გიორგი ჩხარტიშვილი, მეორეხაზელი გურამ ღანიაშვილი, მესამეხაზელი გიორგი კერვალიშვილი, 9 ნომრები გიორგი მარგალიტაძე და დავით ხუროშვილი, ფრთა შაკო აფციაური და ფულბეკი ლუკა ცირეკიძე.

საინტერესოა გიორგი ქართველიშვილის გამოძახება რომელიც დიდი ხანია გამორჩეულად თამაშობს საფრანგეთის PRO D2 - ში ორიაკის შემადგენლობაში .

პირველი შეხვედრა 4 თებერვალს დესაუში, გერმანიასთან გაიმართება. შეხვედრა ჩვენი დროით 18 საათზე დაიწყება. ჯგუფური ეტაპის დანარჩენ ორ თამაშს თბილისში, „ავჭალაზე“ გავმართავთ. 10 თებერვალს 14 საათზე ნიდერლანდებს, ხოლო 17 თებერვალს 16 საათზე ესპანეთს ვერკინებით.

ლევან მაისაშვილი: "ეს ორი თამაში საქართველოსთვის ძალიან დიდი აქტივია"

ika — Mon, 22 Nov 2021 20:00:34 +0400

ბორჯღალოსნების მთავარი მწვრთნელი ლევან მაისაშვილი, ესპანეთში ფიჯისთან ნაჩვენები თამაშით კმაყოფილი დარჩა.

არანხუესში გამართული რკენა დაძაბული გამოდგა და საბოლოოდ ფრედ, 15:15 დასრულდა. მაისაშვილს განსაკუთრებით პირველ ტაიმში ნაჩვენები თამაშის ხარისხი მოეწონა:

„თამაშამდე ღრმა ანალიზი გვქონდა, რა და როგორ უნდა გაგვეკეთებინა და მთლიანობაში ეს მოვახერხეთ. შეხვედრის დებიუტშივე შევძელით თამაშის მართვა, რისი პრობლემაც ძლიერ გუნდებთან სულ გვაქვს ხოლმე. ფიჯიმ შეცდომები დაუშვა და მათი რეალიზება შევძელით. საწყენია, რომ იქით გასატანი ლელო აქეთ მივიღეთ. ამ ეპიზოდში ემოციამ გვძლია, თორემ დარწმუნებული ვარ შემდეგ ფაზაში ლელოს ჩვენ დავდებდით. სამწუხარო იყო ტაიმის ბოლოს აცელილი ჯარიმა. როგორც აღმოჩნდა, ის გადამწყვეტი იქნებოდა. მთლიანობაში, ტაიმმა ჩვენი კარნახით ჩაიარა, ვიყავით ხისტები დაცვაში და კარგად ვმოქმედებდით ფეხით თამაშისას“.

„მეორე ტაიმში ფიჯიმ თავისი თამაში მოგვახვია თავს და ასეთ დროს მისი შეჩერება ძალიან რთულია. მნიშვნელოვანი იყო, რომ შევძელით მათი მოლების გაჩერება და შერკინებაში რამდენჯერმე დავაჯარიმეთ. საწყენია, რომ გამარჯვება ვერ მოვახერხეთ, რისი შანსიც გვქონდა, თუმცა წაგებამდეც ერთი ნაბიჯი იყო. მთლიანობაში, ჩვენი გეგმის ნაწილობრივ განხირციელება შევძელით და თამაშსაც დადებითად ვაფასებ“.

„მიმაჩნია, რომ ამ თამაშით და ზოგადად ამ ტურნეთი, ერთი საფეხურით ზევით ავედით. ბიჭებმა საკუთარი ძალების ირწმუნეს და დაინახეს, რომ ამ მრისხანე მეტოქის დამარცხება შეუძლიათ, რაც ძალიან მნიშვნელოვანია. კარგად გვახსოვს რა შედეგით დასრულდა ფიჯისთან მატჩი 2019 წლის მსოფლიო თასზე. მას შემდეგ, შარშანდელ შეხვედრაში გვქონდა პროგრესი, ახლა კი შარშანდელთან შედარებით იყო პროგრესი. ეს იმის ნიშანია, რომ სწორ გზაზე ვდგავართ. ნოემბრის ორი თამაში საქართველოსთვის ძალიან დიდი აქტივია“.

საქართველო - ფიჯი 15:15 (VIDEO)

ika — Mon, 22 Nov 2021 19:11:49 +0400

საქართველოს ნაკრებმა 2021 წელი ფიჯისთან ფრით დაასრულა.

ესპანეთში, არანხუესში გამართულ დაპირისპირებაში, პირველ ტაიმში უკეთესი საქართველოს ნაკრები იყო, ხოლო მეორე ნახევარში უპირატესობა ფიჯიმ მოიპოვა.

"ბორჯღალოსნებმა" პირველი ტაიმი 9:5 მოიგეს. თედო აბჟანდაძემ სამი ჯარიმა გაიტანა, ხოლო ფიჯელთაგან ლელო ამინიასი ტუიმაბამ დადო, რომელიც ფიჯელთა შესანიშნავ კონტრშეტევას მოჰყვა. მეორე ნახევარში აბჟანდაძემ კიდევ ორი ჯარიმა შეასრულა ზუსტად, ხოლო ფიჯელთაგან ლელოთი ვილიამე მატა გამოირჩა, გარდასახვა და ჯარიმა კი ბენ ვოლავოლამ გაიტანა.

ბოლო 10 წუთი ფიჯელებმა შეტევაში გაატარეს და გამარჯვების მოპოვებას ცდილობდნენ, მაგრამ ქართველმა მორაგბეებმა თავი კარგად დაიცვეს და მატჩი ფრედ 15:15 დასრულდა.

საქართველოს ნაკრებმა 2021 წელი ფიჯისთან ფრით დაასრულა

ika — Sat, 20 Nov 2021 20:29:03 +0400

ლაშა ხმალაძე: "მომავალ მსოფლიო თასს უფრო გამოცდილი გუნდით ვხვდებით"

ika — Thu, 18 Nov 2021 22:27:34 +0400

33 წლის ვეტერანი ბორჯღალოსანი ლაშა ხმალაძე, 20 ნოემბერს ფიჯის წინააღმდეგ მეხუთედ ითამაშებს. მან კუნძულელების წინააღმდეგ მხოლოდ ერთი, შარშანდელი შეხვედრა გამოტოვა და საქართველოს ნაკრების მორაგბეებიდან მომავალ მეტოქეს ყველაზე კარგად იცნობს.

მომავალი თამაშის წინ, მსოფლიო რაგბი ხმალაძის გამოცდილებით დაინტერესდა და მასთან ინტერვიუ ჩაწერა:

„ცენტრალურ ესპანეთში, ქალაქ არანჰუესში, ამ შაბათს ორი ყველაზე განვითარებადი სარაგბო ქვეყნის რკენა გაიმართება.

საქართველო და ფიჯი გეოგრაფიულად სხვადასხვა წერტილში იმყოფებიან, განსხვავებულია მათი კულტურა, ენა და თამაშის სტილიც კი, თუმცა ორივე სწრაფი ტემპებით ვითარდება და ძლიერ მოწინააღმდეგედ ყალიბდება.

2012 წლამდე ამ გუნდებს ერთმანეთში არასდროს უთამაშიათ. სამაგიეროდ, უკანასკნელ რამდენიმე წელში ისინი მეექვსედ შეიბმებიან.
მართალია პირველი თამაში 2012 წელს გაიმართა, მაგრამ ამ გუნდების რეალური დაპირისპირება 2016 წლიდან დაიწყო, როდესაც საქართველო პირველად გაემგზავრა წყნარი ოკეანის ტურნეზე და შინ დაუმარცხებელი დაბრუნდა.

ერთი წლით ადრე, მსოფლიო თასზე მონაწილეობის ისტორიაში ყველაზე წარმატებული ტურნირის შემდეგ, საქართველომ 2019 წლის მსოფლიო თასის პირდაპირი საგზური მოიპოვა (2015 წელს ჯგუფში ორი მოგებით მესამე ადგილი დაიკავა) და წინ დიდი ნაბიჯი გადადგა. აღმოსავლეთ ევროპელების ევოლუციის შედეგად ცხადი გახდა, რომ მის მიმართ პატივისცემა უნდა გამოეხატა ნებისმიერ მეტოქეს და არა მხოლოდ რაგბი ევროპის ჩემპიონატზე მის ტრადიციულ მეტოქეებს.

2016 წლის წყნარი ოკეანის ტურნეს დროს, სამოასთან ფრედ დასრულებული შეხვედრის შემდეგ, საქართველომ ტონგა 23:20, ხოლო ფიჯი 14:3 დაამარცხა.

„ჩემთვის ეს დასამახსოვრებელი ტურნე იყო“ – იხსენებს საქართველოს ნაკრების ვეტერანი უკანახაზელი ლაშა ხმალაძე – „საქართველო პირველად თამაშობდა კუნძულებზე. ეს იყო ღია, გახსნილი თამაში, რომელშიც ვაჩვენეთ რა შეგვიძლია. ამ დაუმარცხებელმა ტურნემ დიდი თავდაჯერებულობა შეგვმატა“.
მას შემდეგ საქართველოს ფიჯისთან აღარ მოუგია. კუნძულელებმა გამარჯვება ჯერ 2019 წლის მსოფლიო თასზე, მერე კი 2020 წლის „შემოდგომის ერთა თასზე“ მოიპოვეს.

„2019 წლის მსოფლიო თასზე ფიჯის ძალიან ძლიერი გუნდი ყავდა. თავიდან თამაში თანაბარი იყო, მაგრამ რამდენიმე არასწორი გადაწყვეტილება მივიღეთ და მეტოქემ გაგვტეხა. ისე ვერ ვითამაშეთ, როგორც ვგეგმავდით და შედეგიც შესაბამისი დადგა“ – იხსენებს ხმალაძე.

უკანასკნელ შეხვედრაში, რომელიც „მარიფილდზე“ გაიმართა, ბორჯღალოსნებმა სამი ლელო დებიუტშივე მიიღეს, თუმცა გამოავლინეს ქართული, მებრძოლი სული და სანახაობრივ მატჩში სამი საპასუხო ლელო გაიტანეს, თუმცა გამარჯვებისთვის ეს საკმარისი აღარ აღმოჩნდა.

2023 წლის მსოფლიო თასის ევროპის შესარჩევ ჯგუფს საქართველო ერთპიროვნულად ლიდერობს და დიდი ალბათობით საფრანგეთის საგზურს ევროპა1-ის სახელით მოიპოვებს, რაც იმას ნიშნავს, რომ მსოფლიო თასზე „გ“ ჯგუფში ფიჯის, უელსის, ავსტრალიის და შესარჩევი ეტაპის ფლეი ოფის გამარჯვებული გუნდის წინააღმდეგ ითამაშებს.

„დღესდღეისობით ევროპის შესარჩევი ეტაპის წამყვანი გუნდი ვართ, თუმცა კიდევ ერთი რაგბი ევროპის ჩემპიონატი უნდა მოვიგოთ, რათა მსოფლიო თასზე ვითამაშოთ. ვიმედოვნებ, რომ ასეც იქნება და მოვხვდებით ჯგუფში, სადაც თამაში ძალიან გვინდა. 2023 წლის მსოფლიო თასს უფრო გამოცდილი გუნდით ვხვდებით და ვეცდებით ვაჩვენოთ ჩვენ ძალა, როგორც გუნდურად, ასევე ინდივიდუალურად“.

33 წლის ხმალაძის საუკეთესო წლები უკვე ჩავლილია, თუმცა ის ფორმაში რჩება და არ გამორიცხავს, რომ ბორჯღალოსან ცენტურიონებს – დავით კაჭარავას, მერაბ კვირიკაშვილს და გიორგი ჩხაიძეს შეუერთდეს.

„მიზანსწრაფულობა, პროფესიონალიზმი, სტაბილურობა, შრომისმოყვარეობა, ჯანმრთელი ცხოვრების წესი“ – ამ ფაქტორებს ასახელებს ხმალაძე, რაც მას მაღალ დონეზე დარჩენის შესაძლებლობას აძლევს.

მის ანგარიშზე 87 კეპია და არასდროს უყვარს საკუთარ მიღწევებზე საუბარი, თუმცა ნაკრებში კიდევ რამდენიმე წელი თამაში უნდა, რადგან ეს ნიშნავს – „მეტ გამოცდილებას და მეტ მოგონებებს“.

რა მოგონებებს დაუტოვებს ხმალაძეს მომავალი შეხვედრა შაბათს გამოჩნდება, თუმცა გამარჯვებისკენ სწრაფვა ერთადერთია, რისკენაც ქართველი ვეტერანი მიილტვის“.

Rugby.Ge

საქართველოს ნაკრების შემადგენლობა ფიჯის წინააღმდეგ

ika — Thu, 18 Nov 2021 20:55:26 +0400

ბორჯღალოსნების სამწვრთნელ შტაბმა 20 ნოემბერს არანხუესში (ესპანეთი), ფიჯისთან გასამართი შეხვედრისთვის შემადგენლობა დაასახელა.

თამაში საქართველოს დროით 18:30 საათზე დაიწყება.

გასულ კვირას საფრანგეთთან ჯახის შემდეგ, ბორჯღალოსნების სასტარტო შემადგენლობაში ერთი ცვლილებაა. მარქაფიდან ძირითადში დაწინაურდა მარცხენა ბურჯი გურამ გოგიჩაშვილი, ბექა გიგაშვილმა კი მარჯვენა ბურჯად გადაინაცვლა. კვაჭის პოზიციაზე კვლავ შალვა მამუკაშვილს ვიხილავთ.
უცვლელი დარჩა მეორე და მესამე ხაზი – გრიგორ ქერდიყოშვილი კოტე მიქაუტაძეს შეუწყვილდება, მათ კი ზურგს ბექა საღინაძე, გიორგი ცუცქირიძე და ბექა გორგაძე გაუმაგრებენ.

ასევე უცვლელი დარჩა ღერძი და ხაზი. 9-10 ნომრებზე გამოცდილ წყვილს ვიხილავთ – ვასილ ლობჟანიძე და თედო აჟანდაძე, ცენტრში მერაბ შარიქაძე და გიორგი კვესელაძე შეწყვილდებიან, ფრთებზე აკა ტაბუცაძე და სანდრო თოდუა დადგებიან, ფულბეკი კი დავით ნინიაშვილია.
წინა მატჩის შემდეგ ორი ახალი სახეა მარქაფაში. ტრავმის მოშუშების შემდეგ განაცხადში დაბრუნდნენ ბურჯი მიხეილ ნარიაშვილი და მეორეხაზელი ლაშა ჯაიანი.

მათ გარდა სათადარიგოთა სკამიდან გუნდს გააძლიერებენ კვაჭი გიორგი ჭყოიძე, ბურჯი ლუკა ჯაფარიძე, მესამეხაზელი თორნიკე ჯალაღონია და ხაზის მოთამაშეები – მიხეილ ალანია, ლაშა ხმალაძე და დემურ თაფლაძე.

სასტარტო შემადგენლობაში მყოფი მორაგბეების კეპების ჯამი 603-ია, საიდანაც 318 ხაზის, ხოლო 285 შერკინების მოთამაშეებზე მოდის.

20 ნოემბერი. 18:30 საათი (საქ. დრო)

საქართველო – ფიჯი | არანხუესი. „ესტადიო ელ დელეიტე“

საქართველო

ხაზი: 15. დავით ნინიაშვილი (ლიონი, 8 კეპი, 23 ქულა), 14. აკაკი ტაბუცაძე (შავი ლომი, 14 კეპი, 60 ქულა), 13. გიორგი კვესელაძე (გლოსტერი, 36 კეპი, 25 ქულა), 12. მერაბ შარიქაძე (შავი ლომი, კაპ. 79 კეპი, 60 ქულა), 11. სანდრო თოდუა (შავი ლომი, 94 კეპი, 65 ქულა), 10. თედო აბჟანდაძე (ბრივი, 27 კეპი, 173 ქულა), 9. ვასილ ლობჟანიძე (ბრივი, 60 კეპი, 55 ქულა);

შერკინება: 1. გურამ გოგიჩაშვილი (რასინგ 92, 24 კეპი, 10 ქულა), 2. შალვა მამუკაშვილი (შავი ლომი, 84 კეპი, 55 ქულა), 3. ბექა გიგაშვილი (ტულონი, 24 კეპი, 10 ქულა), 4. გრიგორ ქერდიყოშვილი (აჟენი, 6 კეპი, 5 ქულა), 5. კოტე მიქაუტაძე (ბაიონი, 69 კეპი, 10 ქულა), 6. ბექა საღინაძე (ლიონი, 24 კეპი, 15 ქულა), 7. გიორგი ცუცქირიძე (ორიაკი, 22 კეპი, 15 ქულა), 8. ბექა გორგაძე (პო, 32 კეპი, 35 ქულა);

მარქაფა: 16. გიორგი ჭყოიძე (ლოკომოტივ-პენზა, 18 კეპი, 5 ქულა), 17. მიხეილ ნარიაშვილი (მონპელიე, 66 კეპი, 5 ქულა), 18. ლუკა ჯაფარიძე (ბრივი, 2 კეპი), 19. ლაშა ჯაიანი (შავი ლომი, 11 კეპი), 20. თორნიკე ჯალაღონია (ბიარიცი, 11 კეპი, 10 ქულა), 21. მიხეილ ალანია (ორიაკი, 6 კეპი), 22. ლაშა ხმალაძე (შავი ლომი, 88 კეპი, 53 ქულა), 23. დემურ თაფლაძე (შავი ლომი, 11 კეპი, 5 ქულა).

Rugby.Ge

იტალიის ნაკრები, შესაძლოა, საქართველოში ვიხილოთ

ika — Thu, 18 Nov 2021 08:47:08 +0400

იტალიის ნაკრები 2022 წელს, შესაძლოა, საქართველოში ჩამოვიდეს და "ბორჯღალოსნებთან" ტესტ-მატჩი გამართოს.

ცნობილი იტალიური გამოცემის Gazzeta Dello Sport-ის ცნობით, იტალიის ნაკრები 2022 წლის ზაფხულის ტესტებზე აღმოსავლეთ ევროპას ეწვევა, კონკრეტულად კი რუმინეთს და საქართველოს. აღნიშნული ინფორმაცია ჯერჯერობით ოფიციალურად არ დადასტურებულა, პირველად ამის შესახებ მხოლოდ გუშინ გაიჟღერა და შესაბამისად, ამ მომენტისთვის მეტი დეტალი უცნობია.

ამავე წყაროს ცნობით, "აძური" შემოდგომის ტესტებზე სამხრეთ აფრიკას, ავსტრალიას და რომელიმე მეორე დონის გუნდს უმასპინძლებს.

შეგახსენებთ, რომ იტალიის და საქართველოს ნაკრებები ბოლოს ერთმანეთს 2018 წელს ფლორენციაში დაუპირისპირდნენ, სადაც მასპინძლებმა 28:17 იმარჯვეს.

ბერნარდ ლაპორტი: "რაგბი 10 ქვეყნის თამაში არაა და საქართველო ამის დასტურია"

ika — Tue, 16 Nov 2021 21:27:34 +0400

მსოფლიო რაგბის ვიცე პრეზიდენტმა ბერნარდ ლაპორტმა, რომელიც ამავდროულად საფრანგეთის რაგბის კავშირის პრეზიდენტიცაა და წლების განმავლობაში საფრანგეთის სპორტის მინისტრის პოსტს იკავებდა, ბორჯღალოსნებს კარგი თამაშისთვის, საქართველოს რაგბის კავშირის პრეზიდენტ იოსებ ტყემალაძეს კი ამბიციური გეგმებისთვის, მადლობა გადაუხადა.

ბორდოში, ‘ლე ბლესა’ და ბორჯღალოსნების თამაშის დასრულების შემდეგ გამართულ მიღებაზე ლაპორტმა განაცხადა:

„დიდი მადლობა ქართველებს ასეთი კარგი თამაშისა და ძლიერი წინააღმდეგობისთვის. მათი თამაში ერთი სიტყვით ფასდება – ბრავო!!! ასევე მადლობა პრეზიდენტ იოსებ ტყემალაძეს ამბიციური გეგმების წარმოდგენისთვის – რაგბის მასობრიობის გაზრდით და ბავშვთა რაგბის განვითარებიდან დაწყებული, სანაკრებო დონით დასრულებული. მე ვამბობ, რომ რაგბი მხოლოდ 10 ქვეყნის თამაში არ არის და საქართველო ამის დასტურია“.

იოსებ ტყემალაძემ იმედი გამოთქვა, რომ ქართულ-ფრანგული ურთიერთობები კიდევ უფრო განმტკიცდება და ლაპორტი საქართველოში მოიწვია:

„მადლობა საფრანგეთს მასპინძლობისა და ამ შესანიშნავი შესაძლებლობისთვის. ჩვენ სწორედ ასეთი თამაშები გვჭირდება სწრაფი განვითარებისთვის. ასევე დიდი მადლობა ბატონ ლაპორტს თბილი და საქმიანი მიღებისთვის. ჩვენ წინ ვიყურებით და დარწმუნებული ვარ, რომ დღეიდან მრავალწლიანი ურთიერთობები კიდევ უფრო განმტკიცდება. სწორედ ამიტომ, მსურს ბატონი ლაპორტი საქართველოში მოვიწვიო. გელოდებით საქართველოში!!!“.

პასუხმაც არ დააყოვნა – „საქართველოში მიპატიჟება მიღებულია და უმოკლეს ვადებში აუცილებლად გეწვევით“ – თქვა ლაპორტმა.

Rugby.Ge

ლევან მაისაშვილი: "მსაჯების კრიტიკა არ მჩვევია, თუმცა ორივე ყვითელი ჩემი აზრით საკამათო სიტუაციაში მოგვცა"

ika — Sun, 14 Nov 2021 23:02:54 +0400

საქართველოს ნაკრები შემოდგომის ტესტების ეგიდით ბორდოში საფრანგეთს დაუპირისპირდა და 15:41 დამარცხდა.

შეხვედრის დასრულების შემდგომ გამართულ პრესკონფერენციაზე ლევან მაისაშვილმა "ლე ბლესთან" მატჩი შეაფასა და შეეხო მსაჯობასაც. "ბორჯღალოსნების" მთავარი მწვრთნელის აზრით, დეიმონ მერფიმ ქართველ მორაგბეებს ორივე შემთხვევაში ყვითელი ბარათი საკამათო ვითარებაში უჩვენა.

როგორც მოგეხსენებათ, საქართველოს ნაკრებს მე-14 წუთზე თედო აბჟანდაძე, ხოლო 23-ე წუთზე ბექა საღინაძე გაუსინბინეს.

"რეალობა ისაა, რომ შეიძლებოდა სხვაობა ბევრად ნაკლები ყოფილიყო და კმაყოფილი არ ვარ. თამაში ჩვენთვის ცუდი სცენარით დაიწყო. ერთ ტაიმში ორი ყვითელი ბარათი, მით უმეტეს ასეთი დონის მეტოქესთან, გუნდს ანგრევს. მსაჯების კრიტიკა არ მჩვევია, თუმცა ორივე ყვითელი ჩემი აზრით საკამათო სიტუაციაში მოგვცა. ამან აგვრია, მაგრამ მეორე ტაიმში შევძელით დაბრუნება და ვთვლი რომ ორი ძალიან კარგი ლელო დავდეთ.

მთელი რიგი ეპიზოდებით, როგორც დაცვაში ასევე შეტევაში, კმაყოფილი ვარ. იყო მომენტები, როდესაც გეგმას მივყვებოდით, მაგრამ რეალობა ისაა, რომ დღესდღეისობით საფრანგეთი მსოფლიოს ერთ-ერთი საუკეთესო გუნდია და ლოგიკურია, რომ თამაში მათი გამარჯვებით დასრულდა.

ბიჭებს ვუთხარი, რომ ხელების ჩამოშვების საფუძველი არ ქონდათ და ბრძოლაში უნდა დარჩენილიყვნენ, რაც გააკეთეს კიდეც. სამწუხაროდ, ორი ისეთი ლელო გავუშვით, რომელიც არ უნდა გაგვეშვა. ფრანგები მოლში მოგვაწვნენ და ამ კომპონენტით ქულები აიღეს, თუმცა იყო ეპიზოდები, როდესაც მათი შეჩერება მოვახერხეთ. საფრანგეთი ძალიან გამოცდილი, მძიმე გუნდია და ლოგიკურიცაა მოლში მათი კარგი თამაში. ჩვენ ამ კუთხით ვმუშაობთ და ნელ-ნელა, მაგრამ წინ მივიწევთ", - ციტირებს მაისაშვილის სიტყვებს რაგბის კავშირის ოფიციალური ვებგვერდი.

საქართველოს ნაკრები მომდევნო მატჩს ესპანეთში ფიჯის წინააღმდეგ 20 ნოემბერს გამართავს.

მერაბ შარიქაძე: "იმედი მაქვს, რომ შემდეგ ჯერზე უკეთესი მსაჯობა იქნება"

ika — Sun, 14 Nov 2021 22:59:16 +0400

საქართველოს ნაკრები შემოდგომის ტესტების ეგიდით ბორდოში საფრანგეთს დაუპირისპირდა და 15:41 დამარცხდა.

აღნიშნული შეხვედრის დასრულების შემდეგ გამართულ პრესკონფერენციაზე საქართველოს ნაკრების კაპიტანი მსაჯობას შეეხო და აღნიშნა, რომ გარკვეულ მომენტებში შეხვედრის მთავარმა მსაჯმა დეიმონ მერფიმ "ბორჯღალოსნების" საზიანოდ შეცდომები დაუშვა.

აღსანიშნავია, რომ საქართველოს ნაკრებს მე-14 წუთზე თედო აბჟანდაძე, ხოლო 23-ე წუთზე ბექა საღინაძე გაუსინბინეს.

"ასეთ მატჩებში მსაჯს ნამდვილად შეუძლია ცვლილებების მოხდენა, ცხადია. ყველამ იცის საფრანგეთის ნაკრების დონე, ისინი ჩვენზე ძლიერები არიან, ამიტომ მათ დახმარება აღარ სჭირდებოდათ. უყურეთ ამ მატჩს კიდევ ერთხელ. დარწმუნებული ვარ, რომ თქვენ იპოვით ბევრ ისეთ მომენტს, რომლებშიც მან ფრანგები არ დააჯარიმა. თქვენ თუ თამაშს კიდევ უყურებთ და გაანალიზებთ მას, ამას დაინახავთ. ეს სამწუხარო და არასწორია ჩვენთვის.

ჩვენ გვქონდა შანსი, რომ საფრანგეთთან გვეთამაშა, რაც ხშირად არ ხდება. ჩვენ მოედანზე მაქსიმუმი გავიღეთ და იმედგაცრუებულები ვიყავით, როდესაც ვხედავდით, რომ ვიღაც არასწორ გადაწყვეტილებებს იღებდა. ეს უნდა მეთქვა. რა თქმა უნდა შეცდომებს ყველა უშვებს, მაგრამ იმედი მაქვს, რომ შემდეგ ჯერზე უკეთესი მსაჯობა იქნება" - განაცხადა საქართველოს ნაკრების კაპიტანმა.

საქართველოს ნაკრები მომდევნო მატჩს ესპანეთში ფიჯის წინააღმდეგ 20 ნოემბერს გამართავს.